نواب شاہ میں کرۂ ارض کا گرم ترین اپریل

اس رپورٹ کے مطابق گیارہ لاکھ آبادی کے اس شہر میں اس پیر کو پچاس ڈگری سے زیادہ درجہ حرارت ریکارڈ کیا گیا ہے۔ اس بارے میں اپنا مشاہدہ فرانس میں موسمیات کے ماہر ایٹینی کاپیکیان نے اپنے ٹوئٹر اکاؤنٹ پر لکھا۔ واشنگٹن پوسٹ کے مضمون کے مطابق  ’ورلڈ میٹریولوجیکل ادارہ‘ ہر ماہ سب سے زیادہ ریکارڈ کیے جانے والے درجہ حرارت پر سرکاری سطح پر رپورٹ نہیں کرتا، اس لیے یہ حتمی طور پر کہنا کہ اپریل میں سب سے زیادہ درجہ حرارت نواب شاہ میں ریکارڈ کیا گیا ہے تھوڑا مشکل ہے۔ لیکن موسمیاتی ماہرین کے مطابق اپریل کے ماہ میں کبھی اتنا زیادہ درجہ حرارت پہلے نہیں ریکارڈ کیا گیا۔

مارچ میں بھی نواب شاہ میں 45.5 ڈگری سینٹی گریڈ درجہ حرارت ریکارڈ کیا گیا تھا۔ پاکستان کے انگریزی اخبار ڈان نیوز کے مطابق نواب شاہ میں ناقابل برداشت گرمی کی لہر کی وجہ سے کئی لوگ بے ہوش ہوئے اور کئی لوگ گرمی لگنے کے باعث بیمار بھی ہوئے ہیں۔