’نواز شریف کا سیاسی سفر ختم‘

جمعے کے روز آنے والا یہ فیصلہ اس لیے نہایت اہمیت کا حامل ہے، کیوں کہ پاکستان میں چند ہی ماہ بعد پارلیمانی انتخابات کا انعقاد ہونا ہے اور نواز شریف کی جماعت ملک کی سب سے بڑی سیاسی قوت سمجھی جاتی ہے۔ ملک کی اعلیٰ ترین عدالت کی جانب سے جمعے کے روز فیصلے میں کہا گیا ہے کہ سابق وزیراعظم نواز شریف پوری زندگی سیاست میں شامل نہیں ہو پائیں گے۔

یہ فیصلہ سپریم کورٹ کے پانچ رکنی بینچ نے دیا ہے۔ واضح رہے کہ 68 سالہ سابق وزیراعظم نواز شریف تین مرتبہ وزارت عظمیٰ کے منصب پر فائز رہ چکے ہیں جب کہ انہیں گزشتہ برس سپریم کورٹ نے کرپشن کے الزامات کے تحت نااہل قرار دیتے ہوئے نہ صرف ان سے وزارت عظمیٰ کا قلم دان چھین لیا تھا بلکہ ان کی پارلیمان کی رکنیت بھی ختم کر دی تھی۔ ان کی نااہلی کے بعد ان کے انتخابی حلقے این اے 120 لاہور سے ضمنی انتخابات میں ان کی اہلیہ کلثوم نواز کامیاب ہوئی تھیں۔

عدالت نے بعد میں ایک اور فیصلے میں نواز شریف کو ان کی سیاسی جماعت کی صدارت سے بھی محروم کر دیا تھا اور نااہل قرار دیے جانے کے بعد بہ طور پارٹی صدر کیے گئے فیصلوں کو بھی کالعدم قرار دے دیا تھا۔

ع ت / ص ز