پاکستان کا بھارتی پٹرولیم مصنوعات خریدنے کا مثبت اشارہ

بھارت سے ایندھن کی خرید میں پاکستانی دلچسپی کی حوالے سے نئی دہلی میں پاکستانی وزیر پٹرولیم ڈاکٹر عاصم حسین نے کہا کہ اگر قیمت مناسب ہوئی تو پاکستان ڈیزل اور جیٹ فیول کی امپورٹ میں مثبت سوچ کے ساتھ آگے بڑھے گا۔ تجزیہ کاروں نے پاکستان اور بھارت کے درمیان تعلقات میں تازہ گرم جوشی پیدا ہونے کے حوالے سے اس بیان کو اہم خیال کیا گیا ہے۔ جوہری ہتھیاروں سے لیس اِن دونوں ہمسایہ ملکوں کے دو طرفہ تعلقات ممبئی میں رونما ہونے والے دہشت گردانہ واقعات کے بعد سے شدید متاثر ہوئے تھے۔

نئی دہلی میں ڈاکٹر عاصم حسین نے کہا کہ بھارت اگر پاکستان کو جیٹ فیول اور ڈیزل کی امپورٹ میں مناسب قیمت دیتا ہے تو اسلام آباد کو اسے قبول کرنے میں کوئی مسئلہ نہیں ہو گا۔ ڈاکٹر عاصم حسین ان دنوں بھارتی دارالحکومت میں ایک بین الاقوامی پیٹرو کیمیکل کانفرنس میں شرکت کے لیے گئے ہوئے ہیں۔ ڈیزل اور جیٹ فیول کے حوالے سے ان کے خیالات کانفرنس کے پہلُو میں جاری دیگر میٹنگوں کے دوران سامنے آئے ہیں۔

ڈاکٹر عاصم حسین کا کہنا تھا کہ زمینی راستے کے ذریعے بھارت سے ڈیزل اور جیٹ فیول کی فراہمی ممکن ہے اور پٹرولیم مصنوعات ان اشیاء میں شمار نہیں ہیں، جن کی خرید ممنوع ہے۔ ڈاکٹر عاصم حسین نے یہ بھی بتایا کہ بھارت کے ایندھن اور توانائی کے بڑے ادارے ہندوستان پٹرولیم کارپوریشن کا ایک اعلیٰ سطحی وفد اس مناسبت سے امکانی حالات کا جائزہ لینے کے لیے جلد ہی پاکستان کا دورہ کرے گا۔

پاکستان اور بھارت کے درمیان تعلقات میں بہتری کے تناظر میں یہ بھی اہم ہے کہ ایک دو ماہ قبل بھارتی حکومت نے پاکستانی سرمایہ کاروں کی جانب سے بھارت میں کاروبار میں سرمایا کاری پر عائد پابندی ختم کر دی تھی۔ بھارتی حکومت نے پاکستانی سرمایا کاروں کو دعوت دی ہے کہ وہ دفاعی شعبے کے علاوہ دیگر تمام شعبوں میں سرمایا کاری کر سکتے ہیں اور اس حوالے سے انہیں تحفظ فراہم کیا جائے گا۔ مبصرین نے اس بھارتی اعلان کو امن کی جانب ایک بڑا قدم قرار دیا تھا۔

دوسری جانب پاکستان نے اس کا وعدہ کر رکھا ہے کہ وہ رواں برس کے اختتام پر بھارت کو تجارت کے حوالے سے پسندیدہ ترین ملک (Most Favoured Nation) یا ایم ایف این ((MFN) کا درجہ دے رہا ہے۔ اس حکومتی فیصلے کی پاکستان میں اپوزیشن اور مذہبی جماعتوں کی جانب سے خاصی مخالفت کی جا رہی ہے۔ بھارت پہلے ہی سن 1990 کی دہائی میں پاکستان کو پسندیدہ ترین ملک (Most Favoured Nation) یا ایم ایف این ((MFN کا درجہ دے چکا ہے۔ دونوں ملکوں کی تجارت کا حجم 2.7 ارب ڈالر کے قریب ہے۔

(ah / ab (AFP