کرم ایجنسی میں نئے ڈرون حملے، سات افراد ہلاک

اطلاعات کے مطابق پہلا حملہ کرم ایجنسی کے علاقے شیدانوں ڈھنڈ میں عسکریت پسندوں کے ایک مبینہ ٹھکانے پر کیا گیا جبکہ دوسرے حملے میں خان ڈھنڈ کے علاقے میں ایک گاڑی کو نشانہ بنایا گیا۔ دونوں حملوں میں مجموعی طور پر سات افراد ہلاک ہوئے۔ پاکستانی قبائلی علاقوں میں عام شہری ان ڈرون حملوں کے خلاف ہیں اور آج پیر کو بھی شمالی وزیرستان میں ان حملوں کے خلاف پہیہ جام ہڑتال کی گئی۔

وزیرستان سے تعلق رکھنے والے سینیٹر سید صالح شاہ نے ان ڈرون حملوں کے بارے میں ڈوئچے ویلے سے گفتگو کرتے ہوئے کہا، ”پاکستان کو اب اپنی خارجہ پالیسی پر نظرثانی کرنا ہوگی۔ جنگ،آپریشن اور حملے مسائل کا حل نہیں ہے۔ تمام مسائل کا حل مذاکرات اور بات چیت ہیں۔‘‘ سینیٹر صالح نے کہا کہ پاکستانی خارجہ پالیسی درست نہیں ہے۔ ’’پاکستان کو اپنی اس پالیسی میں تبدیلی لانا ہوگی۔ یہ پاکستان کی سلامتی کی ضامن پالیسی نہیں ہے۔ پاکستان میں غیر ملکی مداخلت سے حالات مزید خراب ہو رہے ہیں۔“

دوسری جانب مہمند ایجنسی کے علاقے مسعود زیارت میں امن کمیٹی کے دو ارکان کے گھروں کو دستی بموں سے نشانہ بنایا گیا ہے۔ ان حملوں میں ایک بچے سمیت چار افراد جاں بحق جبکہ دو زخمی ہوگئے۔ پہلا حملہ امن کمیٹی کے رکن گلاب خان کے گھر پر کیا گیا، جس میں گلاب خان، ان کا بیٹا اور ایک رشتہ دار ہلاک ہو گئے۔ دوسرا حملہ کمیٹی کے رکن غازی محمد کے گھر پر کیا گیا، جس میں ایک بچہ جاں بحق ہو گیا اور دو دیگر افراد زخمی ہو گئے۔

سرکاری اعداد و شمار کے مطابق مہمند ایجنسی میں گزشتہ تین سال کے دوران امن لشکر اور امن کمیٹیوں کے ڈیڑھ سو کے قریب رضا کاروں کو قتل کیا جا چکا ہے۔ یہی وجہ ہے کہ آج کوئی بھی مقامی شہری کسی امن کمیٹی یا امن لشکر میں شامل ہونے پر تیار نہیں ہوتا۔ مہمند ایجنسی کے پولیٹیکل حکام نے ڈیڑھ ماہ قبل علاقے کے 170 سرکردہ مشیران کو اپنے دفتر میں طلب کیا تھا۔ انہیں بتایا گیا تھا کہ ہر گھر سے کم از کم ایک فرد غلنئی کے ہیڈ کوارٹر میں حاضری دے گا۔ ان کی آمد پر انہیں امن لشکر اور امن کمیٹی قائم کرنے کے لیے کہا گیا تاہم انہوں نے حکومتی اداروں کی طرف سے تحفظ اور وسائل کی کمی کی بنا پر انکار کر دیا تھا۔ اس پر ان تمام افراد کو مبینہ طور پر قید میں ڈال دیا گیا۔

اطلاعات کے مطابق یہ افراد، جن میں کم عمر بچے، نوجوان اور معمر شہری بھی شامل ہیں، تاحال پولیٹیکل انتظامیہ کی تحویل میں ہیں۔ ایسی اطلاعات بھی ہیں کہ پولیٹیکل حکام کے اس اقدام کے خلاف احتجاج کے بعد یہ فیصلہ کیا گیا تھا کہ جس گھر کے ایک سے زیادہ افراد قید ہیں، ان میں سے ایک ایک کو رہا کر دیا جائے گا تاہم تاحال اس فیصلے پر بھی مبینہ طور پر کوئی عمل درآمد نہیں ہو سکا۔

رپورٹ: فریداللہ خان، پشاور

ادارت: مقبول ملک