’ہمیں رات کو تو آرام کرنے دیں‘

اس وقت پاکستان کے شہری علاقوں میں بارہ جبکہ دیہی علاقوں میں اٹھارہ گھنٹے کی طویل لوڈ شیڈنگ کی جا رہی ہے۔ پانی وبجلی کے نگران وفاقی وزیر ڈاکٹر مصدق ملک کا کہنا ہے کہ نگران وزیراعظم کی منظوری کے باوجود وزارت خزانہ نے ساڑھے 17ارب روپے جاری نہیں کیے، جس کے باعث ملک بھر کے عوام کو بجلی کے بدترین بحران کا سامنا ہے۔ جمعرات کی شب اسلام آباد میں صحافیوں کو بریفنگ دیتے ہوئے انہوں نے کہا، ’’اگر ہمیں یہ پیسے مل جائیں تو میرے خیال میں لوگوں کے دکھ کے اندر کمی واقع ہوگی اور جو اس وقت ان کو تکالیف کا سامنا کرنا پڑ رہا ہے، اس میں کافی حد تک کمی واقع ہوگی۔ ہماری تو یہ خواہش تھی کہ اس لوڈشیڈنگ کو آٹھ گھنٹے تک محدود رکھیں اور اس سے اوپر نہ جائیں۔‘‘

ادھر گزشتہ چند روز سے ملک کے اکثر علاقوں میں جاری شدید گرمی کی لہر بھی برقرار ہے۔ وفاقی دارالحکومت میں جمعے کے روز درجہ حرارت تینتالیس ڈگری سینٹی گریڈ ریکارڈ کیا گیا جبکہ سب سے زیادہ درجہ حرارت صوبہ پنجاب کے شہر جھنگ میں سینتالیس ڈگری سینٹی گریڈ رہا۔

اسلام آباد کی رہائشی ایک گھریلو خاتون نائمہ بی بی کا کہنا تھا کہ موجودہ صورتحال اور بجلی کی لوڈ شیڈنگ نے معمولات زندگی کو بری طرح متاثر کیا ہے، ’’بجلی کا بہت مسئلہ ہے، تھوڑی دیر بجلی آتی ہے ۔ پانی بلکل نہیں آتا، جب پانی آنے کا وقت ہوتا ہے تو بجلی چلی جاتی ہے۔ جب بجلی آتی ہے تو پانی نہیں ہوتا، بہت زیادہ مسئلے ہیں۔ ہم لوگ بہت تنگ ہیں۔‘‘

اسلام آباد کی ایک مارکیٹ میں درمیانے درجے کے ہوٹل میں کام کرنے والے طاہر محمود کا کہنا ہے کہ بجلی کی لوڈ شیڈنگ کی وجہ سے وہ رات کو نیند مکمل نہیں کر پاتے، جس سے ان کی صحت متاثر ہورہی ہے۔ انہوں نے کہا، ’’ہم سارا دن مزدوری کرتے ہیں، کم از کم رات کو تو ہمیں دو گھڑی آرام ملنا چاہیے، کم ازکم ہمیں رات کو تو آرام کرنے دیں، بہت پریشانہ ہے۔ راتوں کو سوئے ہوتے ہیں، پھر اٹھ کر بیٹھ جاتے ہیں۔ گھبرا کر صبح کام پر بھی جانا ہوتا ہے اور بچے بھی روز سکول سے لیٹ ہوتے ہیں۔‘‘

تاہم بے بسی کی تصویر بنے نگران وزیر پانی وبجلی ڈاکٹر مصدق ملک کا کہنا ہے کہ اگر انہیں وزارت پانی وبجلی کے حالات کا علم ہوتا تو وہ کبھی بھی یہ وزارت قبول نہ کرتے۔ ان کا کہنا تھاکہ پاکستان سے بجلی کے بحران کو دوسال میں مکمل طور پر ختم کیا جاسکتا ہے۔ انہوں نے کہ پاکستان کے پاس 25 فیصد اضافی بجلی پیدا کرنے کی صلاحیت موجود ہے مگر چند مسائل کے باعث عوام ریلیف سے محروم ہیں۔ انہوں نے کہا کہ وہ یہ بات سمھجنے سے قاصر ہیں کہ اس وقت کونسی ایسی رکاوٹ ہے جو اس مسئلے سے زیادہ بڑی ہے؟

دریں اثناء سینیٹ کی قائمہ کمیٹی برائے پانی وبجلی نے بھی جمعے کے روز اپنے اجلاس میں غیر اعلانیہ لوڈ شیڈنگ پر برہمی کا اظہار کیا ہے۔کمیٹی کے چئیرمین عوامی نیشنل پارٹی کے سینیٹر زاہد خان کا کہنا تھا کہ وزارت کی طرف سے کمیٹی کو غلط اعداد و شمار بتائے جاتے ہیں جبکہ عوام سیاست دانوں کو گالیاں نکالتے ہیں۔

رپورٹ: شکور رحیم، اسلام آباد

ادارت: امتیاز احمد