یورپی یونین کے بیل آؤٹ فنڈ کی ریٹنگ کم کر دی گئی

اس فنڈ کی ریٹنگ ٹرپل اے سے کم کر کے ڈبل اے پلس کی گئی ہے۔ اسٹینڈرڈ اینڈ پُوورز نے یہ بھی کہا ہے کہ اس فنڈ کے لیے اضافی ضمانتیں حاصل کر لی جائیں تو اس کی ٹرپل اے رینکنگ بحال کر دی جائے گی۔

اس فنڈ کی رینکنگ میں کمی فرانس اور آسٹریا کی ریٹنگ میں کمی کا نتیجہ ہے، جو ایس اینڈ پی نے گزشتہ جمے کو ٹرپل اے سے کم کر کے ڈبل اے پلس کر دی تھی۔

فرانس اور آسٹریا کی رینکنگ ٹرپل اے سے ڈبل اے پلس ہونے کے بعد یورو زون میں اب ٹرپل اے ریٹنگ کے حامل ملکوں کی تعداد چار رہ گئی ہے۔

ایس اینڈ پی نے ایک اعلامیے میں کہا ہے کہ فرانس اور آسٹریا ای ایف ایس ایف کے لیے اعلیٰ ضمانت کاروں کا کردار ادا کر رہے ہیں اور ان کی اپنی رینکنگ میں کمی کے بعد اس فنڈ کی رینکنگ بھی برقرار نہیں رہ سکتی۔

یورو زون کے عارضی بیل آؤٹ فنڈ کے تحت کم نرخوں پر قرضے حاصل کرنے کے لیے اس کے اچھی رینکنگ والے ارکان سے ضمانتیں لی جاتی ہیں، جس کا مقصد مالیاتی بحران کے شکار ان ملکوں کی مدد کرنا ہے، جو اپنے طور پر قرضے حاصل کرنے کے متحمل نہیں۔

یورو زون ممالک پہلے ہی ای ایف ایس ایف کی توسیع پر غور کر رہے ہیں۔ اس کی وجہ اسپین اور اٹلی کی معیشتوں پر منڈلاتے خطرات ہیں۔ تاہم جرمنی اس فنڈ کی توسیع کے لیے اپنے حصے میں اضافے پر راضی نہیں ہے۔

اُدھر فرانسیسی صدر نکولا سارکوزی نے کہا ہے کہ یورپ کو ’خلافِ معمول بحران‘ کا سامنا ہے اور شرح نمو کے لیے نئے راستے کی تلاش ناگزیر ہے۔

پیر کو میڈرڈ میں اسپین کے وزیر اعظم ماریانو راخوئے سے بات چیت کے بات انہوں نے ایک بیان میں کہا کہ اخراجات اور خسارے میں کمی کے ساتھ ساتھ مسابقت کے مسائل حل کرنے ہوں گے۔

ان کا یہ بیان ایسے وقت سامنے آیا ہےجب یورپین سینٹرل بینک یورو زون کے بونڈز کی خریداری تین گنا بڑھاتے ہوئے تقریباﹰ پونے چار ارب یورو کر چکا ہے، جس کا مقصد قرضوں پر اٹھنے والے اخراجات پر قابو پانا ہے۔

رپورٹ: ندیم گِل / خبر رساں ادارے

ادارت: عابد حسین