یورپی یونین کے نئی ایگزیکٹو ٹیم کی تشکیل کا تنازعہ ختم

یورپی پارلیمنٹ کے اہم سیاسی گروپوں نے بدھ کے روز یورپی یونین کی نئی ایگزیکٹو ٹیم کی تشکیل کے لیے ایک معاہدے پر اتفاق کر لیا۔ ساتھ ہی متنازعہ سخت دائیں بازو کی کمشنر کو دوبارہ منتخب کرنے کی راہ بھی ہموار ہو گئی ہے۔  

دائیں بازو کی کمشنر کی دوبارہ تقرری کا معاملہ  ایک ہفتہ طویل تعطل کے بعد  مرکزی دائیں بازو کی یورپی پیپلز پارٹی کے رہنما، سینٹر لیفٹ سوشلسٹ اور ڈیموکریٹس اور سینٹرسٹس کے اتفاق سے طے پا گیا ہے۔ اس سے اگلے ہفتے دسمبر کے آغاز میں پارلیمنٹ کی توثیقی ووٹنگ  کا راستہ بھی کھل گیا ہے۔

سینئر قانون سازوں نے برسلز میں رات گئے ہونے والی بات چیت کے بعد کمیشن کے ان سات ارکان کی بھی منظوری دے دی، جن کی منظوری ابھی باقی تھی، بشمول تمام چھ نائب صدور کے۔ اس امر کی سیاسی گروپوں نے تصدیق بھی کی۔

یورپی کمیشن کی سربراہ نے نئے ارکان کے ناموں کا اعلان کر دیا

یورپی پارلیمنٹ میں طاقت کے توازن کا فقدان

یورپی یونین کی نئی ایگزیکٹيو ٹیم کی تشکیل کا عمل پچھلے ہفتے تعطل کا شکار اُس وقت ہو گیا تھا، جب پارلیمنٹ میں طاقت کے توازن کے لیے قانون سازوں نے متعدد نامزد امیدواروں پرتنازعہ کھڑا کر دیا۔

مرکز اور بائیں بازو کے گروپ اس بات سے ناخوش تھے کہ اٹلی کی سخت دائیں بازو کی ''برادرز آف اٹلی پارٹی‘‘ کے رافائیل فیٹو کو ان کی سیاسی وابستگی کے باوجود نائب صدر کا عہدہ سونپا گیا۔ ان کے یورپی کنزرویٹو اور ریفارمسٹ (ECR) گروپ نے دوسری مدت کے لیے فان ڈیئر لائن کی نامزدگی کی حمایت نہیں کی۔

دریں اثناء اطالوی وزیر اعظم جارجیا میلونی نے رافائیل فیٹو کے نائب صدر بننے کی تصدیق کو ''موزوں‘‘ فیصلہ قرار دیا۔ اس کی ایک دلیل اٹلی کا یورپی یونین کے بانی ملک کے طور پر کردار بھی ہے اور یہ یورپ کا دوسرا سب سے بڑا صنعت کار اور براعظم کی تیسری سب سے بڑی معیشت ہے۔‘‘

ہنگری کا ماسکو کے لیے ’امن مشن، برسلز برہم

سہ فریقی معاہدہ

خبر رساں ایجنسی اے ایف پی کے مطابق مذکورہ معاہدے کے مندرجات یہ ہیں کہ تینوں رہنماؤں نے یورپ کے دفاع اور مسابقت کو بڑھانے سمیت متعدد امور پر ''تعاون‘‘ پر اتفاق کیا ہے۔ 

واضح رہے کہ اس معاہدے کے تعطل کے دوران  اسپین کی ایک سوشلسٹ سیاستدان ٹریسا ریبیرا کو یورپی یونین کی سب سے طاقتور کمشنر بننے سے روکا گیا۔ ریبیکا یورپی کمشن کی مسابقتی سربراہ کے طور پر ایک امیدوار ہو سکتی تھیں۔

یورپی یونین کی سیاسی جماعتوں نے ڈس انفارمیشن مخالف معاہدے پر دستخط کر دیے

تاہم قانون سازوں نے ہسپانوی حکومت کی وزیر ربیرا پر ویلینسیا کے علاقے میں آنے والے سیلابوں سے نمٹنے کے لیے غلط طریقہ کار اپنانے کا الزام عائد کیا اور مطالبہ کیا کہ وہ اپنی نامزدگی سے قبل میڈرڈ میں پارلیمنٹ سے خطاب کریں، جو انہوں نے بدھ کو کیا۔

ک م/ ع ب(اے ایف پی)