19سالہ جرمن لڑکی یورو وژن مقابلے کی فاتح

ہفتے کی شب انہوں 24 یورپی ملکوں کے گلوکاروں کو شکست دے کر یہ اعزاز جرمنی کے لئے حاصل کیا۔

مقابلے کے فائنل میں انہیں برطانوی طرز کے پاپ گیت ’’سیٹیلائیٹ‘‘ گانے پر بہترین گلوکارہ کا اعزاز دیا گیا۔ اس پروگرام کو یورپ بھر کا سب سے زیادہ دیکھا جانے والا پروگرام بھی کہا جاتا ہے۔

55 ویں یورو ویژن مقابلے کی فاتح لینا جرمنی کی طرف سے ایسی دوسری گلوکارہ ہیں، جنہیں یورپ بھر سے اس مقابلے میں شریک گلوکاروں پر فتح حاصل ہوئی۔ ایک غیر معروف گلوکارہ لینا کو جرمنی میں اس وقت پہچانا جانے لگا تھا، جب انہوں نے اس مقابلے کا کوالیفائینگ راؤنڈ جیت کر حتمی مقابلے میں اپنی جگہ بنائی تھی۔

انہوں اس آخری مقابلے میں اوسلو کے ایک بہت بڑے کراؤڈ کے سامنے پرفارم کیا اور ان کی بہترین گلوکاری کے ساتھ ساتھ توانا آواز اور شخصیت کے جادو نے اس مقابلے کی جیت میں ان کی راہ کچھ اور بھی ہموار کر دی تھی۔

اسٹیج پر لینا کے نام سے شہرت پانے والی اس جرمن گلوکارہ کا پورا نام لینا مائر لانڈروٹ ہے۔ لینا نے اس جیت کے بعد اپنے تاثرات کا اظہار کرتے ہوئے کہا : ’’یہ ایک ناقابل یقین موقع ہے، مجھے یوں لگ رہا ہے، جیسے یہ حقیقت نہیں۔ مجھے بہت اچھا محسوس ہو رہا ہے۔‘‘

یورو ویژن نامی اس مقابلے کو گزشتہ برس 124 ملین افراد نے دیکھا تھا۔ یورپین سونگ چیمپیئن شپ کہلانے والے اس مقابلے میں عموما غیر معروف یورپی گیت گائے جاتے ہیں۔

ماضی میں اس مقابلے میں باقاعدہ پیشہ ور گلوکار شریک ہوتے رہے ہیں تاہم اس بار اس مقابلے کی فاتح لینا نے گلوکاری کی کوئی باقاعدہ تربیت بھی نہیں لی۔

رپورٹ : عاطف توقیر

ادارت : شادی خان سیف