آئی فون فور، تین دن میں 17 لاکھ فروخت
29 جون 2010
امریکی کمپیوٹر ساز ادارے ایپل نے اب ایک اور ریکارڈ قائم کیا ہے اور وہ ہےاس کمپنی کے تیارکردہ آئی فون کے نئے ماڈل یعنی آئی فون فور کی تین دن میں ریکارڈ فروخت جو کہ 17 لاکھ رہی۔
ایپل کمپنی کے تیار کردہ اس سمارٹ فون کی فروخت جمعرات 24 جون سے شروع ہوئی۔ حیران کن طور پر پہلے ہی دن امریکہ بھر میں ایپل اور موبائل سروس فراہم کرنے والے ادارے AT&T اسٹورز کے باہر آئی فون فور کے پرستاروں کی لمبی قطاریں نظر آئیں۔
ہفتے کے دن تک فروخت کے اعداد وشمار کے حوالے سے ایپل کمپنی کے چیف ایگزیکٹیو آفیسر اسٹیو جابز کا کہنا ہے کہ یہ ایپل کمپنی کی تاریخ کے کسی بھی پراڈکٹ کا کامیاب ترین آغاز ہے۔
آئی فون فور میں گزشتہ ماڈلز کی نسبت بہت سے بہتر فیچرز موجود ہیں، جن میں ویڈیوکانفرنسنگ کے علاوہ ایپل کے مطابق کسی بھی فون میں اب تک کا سب سے زیادہ ہائی ریزولوشن ڈسپلے، جسے ریٹینا ڈسپلے کا نام دیا گیا ہے شامل ہے۔
اس فون میں پانچ میگا پکسل کا کیمرہ ایل ای ڈی فلیش کے ساتھ موجود ہے، جس کے ذریعے ایچ ڈی کوالٹی ویڈیو ریکارڈ کی جاسکتی ہے، جب کہ اس فون کا ٹالک ٹائم بھی گزشتہ ماڈل کی نسبت 40 فیصد زائد ہے۔
رپورٹ : افسر اعوان
ادارت : شادی خان سیف