'آئے گا ایک بھی نہیں جائیں گے بہت سے‘، سالوینی

مہاجرین کے موضوع پر ہونے والی ایک کانفرنس سے محض دو روز قبل اٹلی کی تین ہفتے پرانی حکومت نے مہاجرین کی آمد کو روکنے کے عزم کا اظہار کرتے ہوئے کہا ہے کہ مہاجرین کے جہازوں کو یا تو سمندر میں روک لیا جائے گا یا پھر انہیں اطالوی بندرگاہوں تک نہیں آنے دیا جائے گا۔

اٹلی کے وزیر داخلہ ماتیو سالوینی نے جرمن جریدے اشپیگل سے بات کرتے ہوئے کہا،’’ ہم ایک بھی مزید تارک وطن کو قبول نہیں کر سکتے۔ بلکہ ہم تو کئی ایک کو واپس بھیج رہے ہیں۔‘‘

پناہ کے نظام پر مذاکرات تعطل کا شکار ، سالوینی غائب

اطالوی وزیر داخلہ نہ صرف ملک میں مہاجرین مخالف جماعت کے سربراہ ہیں بلکہ ملک کے نائب وزیراعظم کے عہدے پر بھی فائز ہیں۔ مہاجرین کی قبولیت کے حوالے سے سالوینی غیر لچک دار اور سخت موقف رکھتے ہیں۔

یہ سالوینی ہی تھے، جنہوں نے گزشتہ ہفتے چھ سو سے زائد مہاجرین کو لانے والے امدادی جہاز ایکوئیریس کو اٹلی کے پانیوں میں داخل ہونے کی اجازت نہیں دی تھی۔ جمعرات کے روز ایک جرمن این جی او کے امدادی جہاز ’’مشن لائف لائن‘‘ کے حوالے سے سالوینی نے ٹویٹ پیغام میں لکھا،’’ غیر قانونی کشتی لائف لائن اب مالٹا کی سمندری حدود میں ہے۔ جس میں عملے اور مہاجرین سمیت 239 افراد سوار ہیں۔ عملے اور مسافروں کی حفاظت کے لیے ہم نے مالٹا کی حکومت سے اپنی بندرگاہیں کھولنے کو کہا ہے۔ ظاہر ہے کہ جہاز کو روک کر اس کے عملے کو گرفتار کیا جانا چاہیے۔‘‘

یاد رہے کہ آئندہ اتوار کو مہاجرین کے موضوع پر ایک اجلاس ہونے جا رہا ہے جس میں یورپی یونین کے تمام اٹھائیس رکن ممالک پناہ کے نظام  کی تجدید نو پر بات چیت کریں گے۔

ص ح / ع ت / اے ایف پی