آسیہ بی بی کے دفاع کے لیے پاکستان جاؤں گا، سیف الملوک

پاکستانی دارالحکومت اسلام آباد سے منگل پچیس دسمبر کو ملنے والی نیوز ایجنسی ایسوسی ایٹڈ پریس کی رپورٹوں کے مطابق سیف الملوک نے توہین اسلام کے جرم میں ماضی میں ایک زیریں عدالت کی طرف سے سزائے موت کا حکم پانے والی پاکستانی مسیحی خاتون آسیہ بی بی کا کامیابی سے قانونی دفاع کیا تھا اور اس سال 21 اکتوبر کو ملکی سپریم کورٹ نے اس اقلیتی شہری کو ان کے خلاف الزامات سے بری کر دیا تھا۔

آسیہ بی بی، جن کی عمر اس وقت 54 برس ہے اور جو پانچ بچوں کی ماں ہیں، بری کیے جانے کے چند روز بعد پاکستانی شہر ملتان کی ایک جیل سے رہا کر دی گئی تھیں، جہاں سے انہیں بذریعہ ہوائی جہاز اسلام آباد پہنچا دیا گیا تھا۔

ان کی جیل سے رہائی کے بعد سے لے کر اب تک انہیں ان کی سلامتی کو لاحق خطرات کے باعث پاکستان ہی میں کہیں انتہائی حفاظت میں رکھا جا رہا ہے۔

پاکستانی حکام نے باقاعدہ طور پر ابھی تک یہ نہیں بتایا کہ انہیں کہاں رکھا گیا ہے۔ آج منگل کے روز، جب دنیا بھر میں کرسمس کا مسیحی تہوار منایا جا رہا ہے، کیتھولک عقیدے کی حامل آسیہ بی بی نے بھی یہ تہوار سخت سکیورٹی انتظامات کے تحت منایا۔

آسیہ بی بی کو بری کرنے کے پاکستانی سپریم کورٹ کے فیصلے کے بعد ملک میں بنیاد پرستی کی حد تک سخت گیر سوچ کی حامل مذہبی تنظیم تحریک لبیک کی طرف سے پرتشدد مظاہرے شروع کر دیے گئے تھے۔

تب ان مظاہروں میں ان مسلم مذہبی حلقوں کی طرف سے عدالت عظمیٰ کے فیصلے کا احترام نہ کرتے ہوئے یہ مطالبے بھی کیے گئے تھے کہ آسیہ بی بی کو سرعام پھانسی دی جائے۔

آسیہ بی بی کو ان کے خلاف لگائے گئے پیغمبر اسلام کی توہین کے الزام کے بعد  2010ء میں سزائے موت کا حکم سنایا گیا تھا، جس کے بعد سے وہ قریب دو ماہ قبل اپنی رہائی تک مسلسل جیل میں بند تھیں۔

اکتوبر کی تیسرے عشرے میں تحریک لبیک کے حامی حلقوں کی طرف سے سپریم کورٹ کے آسیہ کے حق میں فیصلے کے خلاف ایک اپیل بھی دائر کر دی گئی تھی۔ پاکستانی سپریم کورٹ نے ابھی تک اس اپیل کی نہ تو سماعت شروع کی ہے اور نہ ہی اس کے لیے تاحال کوئی تاریخ مقرر کی گئی ہے۔

ایسوسی ایٹڈ پریس نے لکھا ہے کہ اس بارے میں آسیہ بی بی کے وکیل صفائی سیف الملوک نے منگل کے روز کہا کہ جب بھی اس اپیل کی سماعت ہو گی، وہ اپنی مؤکلہ کے عدالتی دفاع کے لیے پاکستان ضرور جائیں گے۔ سیف الملوک نے یہ بات آج کرسمس کے تہوار کی مناسبت سے کہی۔

م م / ا ا / اے پی