اسامہ کا پتہ لگانے میں ناکامی سب کی غلطی ہے، گیلانی

سید یوسف رضا گیلانی نے دورہ فرانس کے موقع پر پیرس میں صحافیوں سے گفتگو میں کہا کہ امریکہ سمیت پوری دنیا اس ناکامی کی ذمہ دار ہے۔ انہوں نے کہا، ’انٹیلی جنس کی ناکامی کے لیے پوری دنیا ذمہ دار ہے، صرف پاکستان نہیں۔‘

انہوں نے کہا کہ پاکستان کو دہشت گردی کے خاتمے کے لیے دنیا کی معاونت درکار ہے۔ پاکستانی وزیر اعظم کا کہنا تھا، ’ہم دہشت گردی اور انتہاپسندی پر قابو پانے کے لیے لڑ رہے ہیں اور اس کی بھاری قیمت چُکا رہے ہیں۔ صرف پاکستان کے لیے نہیں بلکہ عالمی امن، خوشحالی اور ترقی کے لیے لڑ رہے ہیں۔‘

اسلام آباد حکومت کا کہنا ہے کہ وہ شدت پسندوں کو محفوظ ٹھکانے فراہم نہیں کرتی۔ خبررساں ادارے اے ایف پی کے مطابق پاکستانی انٹیلی جنس حکام کا کہنا ہے کہ ایبٹ آباد میں اسامہ بن لادن کے رہائشی کمپاؤنڈ پر 2003ء میں چھاپہ مارا گیا تھا۔ ان کا کہنا ہے کہ اس وقت وہ کمپاؤنڈ زیرتعمیر تھا جبکہ کارروائی کا مقصد القاعدہ کے رہنما ابو فرج الليبی کی گرفتاری تھا، جسے اس کے دو برس بعد گرفتار کیا گیا۔ انٹیلی جنس حکام کے مطابق آئی ایس آئی کو اس بات کا پتہ نہیں چلا کہ بعد ازاں اسامہ وہاں جا بسا۔

اے ایف پی کے مطابق پاکستانی سیکرٹری خارجہ سلمان بشیر نے ایک برطانوی نشریاتی ادارے کے ساتھ بات چیت میں کہا ہے کہ آئی ایس آئی نے تقریباﹰ دو برس پہلے امریکہ کو اس کمپاؤنڈ کے حوالے سے اپنی تشویش سے آگاہ کر دیا تھا۔

سلمان بشیر کا یہ بھی کہنا تھا کہ اس وقت اسامہ کے وہاں موجود ہونے کی خبر نہیں تھی بلکہ اس کی ممکنہ رہائش کے حوالے سے لاکھوں مقامات مشتبہ تھے۔

خیال رہے کہ پاکستان کے قبائلی علاقوں میں ڈرون حملوں اور سی آئی اے کے کانٹریکٹر ریمنڈ ڈیوس کی گرفتاری پر اسلام آباد اور واشنگٹن حکومتوں کے درمیان سفارتی محاذ آرائی شروع ہوئی۔ باہمی تعلقات کی فضا بہتر بنانے کی کوششیں جاری تھیں کہ ایسے میں اسامہ بن لادن کی ہلاکت کا واقعہ سامنے آ گیا ہے۔

رپورٹ: ندیم گِل/خبررساں ادارے

ادارت: افسر اعوان