اسد مخالف باغی غوطہ چھوڑنے پر تیار

باغیوں کے ساتھ یہ سمجھوتہ صدر بشار الاسد کے حامی ملک روس کی مدد سے طے پایا ہے۔ اس معاہدے کے بعد مشرقی غوطہ کے باغیوں کے زیر قبضہ تین علاقوں میں سے مزید ایک علاقہ شامی فورسز کے کنٹرول میں چلا جائے گا۔ مشرقی غوطہ میں اب بھی دو علاقے شامی باغیوں کے قبضے میں ہیں اور وہ وہاں سے انخلاء کے لیے تیار نہیں ہیں۔ باقی رہ جانے والے ان دو علاقوں میں ہزاروں عام شہری بھی محصور ہیں اور شامی فورسز نے گزشتہ پانچ برسوں سے اس علاقے کا محاصرہ کر رکھا ہے۔

شامی فورسز نے اٹھارہ فروری کو مشرقی غوطہ میں شدید بمباری کا سلسلہ شروع کر دیا تھا اور وہ آہستہ آہستہ اس تمام علاقے پر قبضہ کرتی جا رہی ہیں۔ اس پیش رفت کے نتیجے میں مشرقی غوطہ کا علاقہ تین حصوں میں تقسیم ہو گیا تھا اور ان تین حصوں میں سے ایک علاقے کے باغیوں نے معاہدہ کر لیا ہے۔ جس علاقے کے باغیوں نے معاہدہ کیا ہے، ان کا گروپ احرار الشام کے نام سے جانا جاتا ہے۔

غوطہ میں احرار الشام گروپ کے ترجمان کا کہنا تھا، ’’غوطہ کے ہرستا نامی علاقے میں معاہدے کے تحت باغی اپنے ہتھیاروں سمیت علاقے سے باہر نکل رہے ہیں۔ ہر وہ شہری بھی نکل رہا ہے، جو روسی ضمانت پر شمالی شام کا یہ علاقہ چھوڑنا چاہتا ہے۔‘‘

اٹھارہ فروری کے بعد سے صدر اسد کی حامی فورسز کی بمباری کے نتیجے میں کم از کم 14 سو عام شہری ہلاک ہو چکے ہیں۔ بتایا گیا ہے کہ علاقہ چھوڑنے والے باغیوں کو صوبہ ادلب میں بسوں کے ذریعے پہنچایا جائے گا۔ یہ صوبہ حکومت کے کنٹرول میں ہے لیکن ہتھیار پھینکنے والے تمام باغی گروپوں کو وہاں ہی پہنچایا جا رہا ہے۔ ہتھیار پھینکنے والے ترکی کے حمایت یافتہ تمام باغیوں کو بھی اسی صوبے میں لایا گیا تھا۔

اطلاعات کے مطابق مشرقی غوطہ کے باقی دو علاقوں کے باغی بھی مذاکرات جاری رکھے ہوئے ہیں اور وہ بھی کسی معاہدے کے تحت یہ علاقہ چھوڑ دیں گے۔