اسرائیل کی جی ٹوئنٹی اجلاس کے مجوزہ اعلامیے پر سخت ناراضی

اسرائیلی وزیر خارجہ گیدون سار نے غزہ پٹی کے تنازعے کو حل کرنے کے لیے برازیل میں جی ٹوئٹنی ممالک کے سربراہی اجلاس کے مجوزہ حتمی اعلامیے کے مسودے پر تنقید کرتے ہوئے اسے ''غیر متوازن اور متعصبانہ‘‘ قرار دیا ہے۔

 سار نے سوشل میڈیا پلیٹ فارم ایکس پر ایک پوسٹ میں کہا کہ انہوں نے ہفتے کے آخر میں جی ٹوئٹنی ریاستوں کے متعدد وزرائے خارجہ کو فون کیا اور کل بروز پیر شروع ہونے والے دو روزہ اجتماع سے قبل اس ایونٹ کے حتمی اعلامیے کے مجوزہ مسودے پر اپنی ناراضی کا اظہار کیا۔

 سار نے کہا، ''یہ ایک  قرارداد کے خلاصے کے مسودے کے بارے میں موصول ہونے والی معلومات کی روشنی میں تھا، جو اسرائیل کے خلاف، غیر متوازن اور متعصبانہ ہے۔‘‘ ان کا کہنا تھا، ''اپنے ہم منصبوں کے ساتھ اپنی بات چیت میں، میں نے کہا کہ  ہمارے خطے میں تنازعات سے متعلق اعلامیے کے خلاصے میں اسرائیل کے اپنے دفاع کے حق کو تسلیم کرنا، حماس کے دہشت گردوں کے ہاتھوں 400 دنوں سے زیادہ خوفناک حالات میں قید تمام یرغمالیوں کی رہائی کا مطالبہ اور حماس اور حزب اللہ دونوں کی مذمت شامل ہونا چاہیے۔‘‘

ان کا مزید کہنا تھا کہ ایسا کوئی بھی اعلامیہ، جس میں یہ عناصر شامل نہیں، اس سے ''امن اور سلامتی کو نقصان پہنچے گا اور  یہ صرف ایران اور اس کی حمایت یافتہ تنظیموں کو پورے مشرق وسطٰی میں عدم استحکام پھیلانے کی ترغیب دینے کا کام کرے گا۔‘‘

 ایران کو فلسطینی عسکریت پسند تنظیم حماس اور لبنان میں حزب اللہ کے ساتھ ساتھ مشرق وسطیٰ میں کئی دیگر ملیشیاؤں کا اہم حامی سمجھا جاتا ہے، جو اسرائیل کے مخالف ہیں۔ اسرائیل جی ٹوئٹنی کا رکن نہیں ہے جبکہ سعودی عرب دنیا کی طاقتور ترین معیشتوں کے اس فورم کا واحد عرب رکن  ہے۔

ش ر⁄ ا ا ، ع ت (ڈی پی اے)