اسرائیلی وزیر اعظم کی مبینہ کرپشن کا جرمن کمپنی سے کیا تعلق؟

جرمنی اور اسرائیل میں کئی عوامی حلقے یہ جاننا چاہتے ہیں کہ اگر اسرائیل میں وزیر اعظم بینجمن نیتن یاہو کے خلاف بدعنوانی کے الزام میں باقاعدہ چھان بین کی سفارش کی گئی ہے، تو اس بات کا جرمنی کے معروف فولاد ساز ادارے تِھسّن کرُپ سے کیا تعلق ہے؟

اسرائیل کو تین آبدوزوں کی فروخت، جرمن حکومت نے منظوری دے دی

اس بارے میں ڈوئچے ویلے کے بینجمن نائٹ نے اپنی ایک رپورٹ میں لکھا ہے کہ اس اسکینڈل میں ایک طرف تو کافی عرصے سے برسراقتدار اسرائیلی وزیر اعظم نیتن یاہو ہیں اور دوسری طرف جرمنی کے سب سے بڑے صنعتی کاروباری اداروں میں سے ایک، جس کا نام تِھسّن کرُپ (ThyssenKrupp) ہے۔ یہ جرمن صنعتی کمپنی ایک بہت بڑا فولاد ساز ادارہ ہے، جو آبدوزیں بھی بناتا ہے۔ کرپشن کے الزامات ثابت ہو گئے تو نتیجہ نیتن یاہو حکومت کے خاتمے کی صورت میں بھی نکل سکتا ہے۔

اسرائیلی پولیس نے اپنے طور پر جو تفتیش کی، اس کے نتائج کے مطابق نیتن یاہو کے دو قریبی ساتھیوں نے لابیئنگ کرتے ہوئے ملکی وزارت دفاع کے حکام کو اس امر کا قائل کیا کہ وہ اسرائیلی بحریہ کے لیے آبدوزیں تِھسّن کرُپ سے خریدیں۔ تِھسّن کرُپ کا ہیڈ کوارٹر جرمنی کے شہر اَیسن میں ہے اور اسی ادارے کی ’تِھسّن کرُپ میرین سسٹمز‘ یا TKMS نامی ذیلی کمپنی آبدوزیں بناتی ہے۔

یہ جرمن اسرائیلی کاروباری معاہدہ گزشتہ برس اکتوبر میں طے پایا تھا، جب برلن میں وفاقی جرمن حکومت نے اس بات کی منظوری دے دی تھی کہ تِھسّن کرُپ کا ذیلی ادارہ ٹی کے ایم ایس اسرائیلی بحریہ کو تین ’ڈولفن‘ آبدوزیں اور چار بحری جہاز فروخت کر سکتا ہے۔ اس دفاعی معاہدے کی مالیت دو ارب یورو یا قریب ڈھائی ارب ڈالر کے برابر تھی۔

اسرائیلی وزیر اعظم بدعنوانی کے الزامات کی زد میں

اسرائیل کو شام میں ابھی اور ’سرپرائز‘ ملیں گے، دمشق کی تنبیہ

اہم بات یہ بھی ہے کہ شروع میں جرمن حکومت نے اس معاہدے کی منظوری تین ماہ تک اس لیے روک دی تھی کہ تب اسرائیل میں اس حوالے سے تحقیقات جاری تھیں۔ اسرائیل میں اس موضوع پر تفتیش کو ’کیس 3000‘ کا نام دیا گیا تھا۔

اس اسکینڈل میں خود نیتن یاہو پر تو براہ راست کرپشن کا شبہ نہیں کیا جا رہا لیکن اس میں دو ایسے افراد ملوث ہیں، جن پر نیتن یاہو سب سے زیادہ اعتماد کرتے ہیں۔ ان افراد سے پوچھ گچھ گزشتہ برس نومبر میں شروع کی گئی تھی۔ ان میں سے ایک ژیٹساک مولچو ہیں، جو اسرائیلی وزیر اعظم کے سفارتی نمائندے ہیں، اور دوسرے ڈیوڈ شمرون، جو نیتن یاہو کے قریب ترین معتمد اور خاندانی وکیل ہونے کے علاوہ اسرائیل میں تِھسّن کرُپ کے ایجنٹ مِیکی گانور کی قانونی نمائندگی بھی کرتے ہیں۔

جرمنی میں وفاقی حکومت یا تِھسّن کرُپ کی طرف سے اب تک اس بارے میں کچھ بھی نہیں کہا گیا، سوائے اس کے کہ اس جرمن صنعتی ادارے نے اپنے طور پر اس معاہدے اور اس اسکینڈل کے پس منظر کی چھان بین کا فیصلہ کیا ہے۔

ایف سولہ شامی میزائل سے تباہ ہوا، اسرائیلی اہلکار

جرمن اسلحے کی برآمدات 7.5 بلین تک پہنچ گئیں

اسرائیلی حکام کا خیال ہے کہ اس پورے اسکینڈل میں مِیکی گانور اہم ترین شخصیت ہیں، جنہیں ملکی پولیس نے گزشتہ برس جولائی میں اس اسکینڈل کے سامنے آنے کے بعد پہلے مرحلے میں ہی گرفتار کر لیا تھا۔ ان پر شبہ تھا کہ انہوں نے TKMS کی طرف سے اسرائیلی حکومتی اہلکاروں کو رشوت دی تھی۔

اس اسکینڈل میں کئی ماہ تک حقائق کی تلاش کرنے والے ایک اسرائیلی صحافی راویو درُکر کے مطابق اس معاملے کا ایک پہلو یہ بھی ہے کہ اسرائیل شروع میں اپنی بحریہ کے لیے یہ نیول شپ جنوبی کوریا سے خریدنا چاہتا تھا۔ لیکن پھر اچانک جرمن آبدوزوں کے ساتھ ساتھ جرمن ساختہ بحری جہاز خریدنے کا بھی فیصلہ کر لیا گیا، حالانکہ وہ زیادہ بڑے اور بہت مہنگے بھی تھے اور ان کی ترسیل بھی مقابلتاﹰ کافی لمبے عرصے بعد کی جانا تھی۔