اسپین میں ’شدت پسندی کو فروغ دینے والے‘ تین پاکستانی گرفتار

ہسپانوی وزارت داخلہ کی جانب سے جاری کردہ ایک بیان کے مطابق 25 سے 31 برس کے ان تین بھائیوں کو جمعے کے روز شمال مشرقی شہر للیدا میں ان کے گھر سے گرفتار کیا گیا ہے۔

حکام کا کہنا ہے کہ یہ بھائی شدت پسند تنظیم اسلامک اسٹیٹ کی جانب سے کیے جانے والے اجتماعی قتل، خودکش حملوں، اور اسلامی قوانین کی حمایت اور شعیہ مذہب کے خلاف سوشل میڈیا پر ویڈیوز اور پیغامات اپ لوڈ کرتے تھے۔

ان پاکستانیوں پر انٹرنیٹ پر طالبان اور پاکستان کے دیگر شدت پسند گروہوں کے حق میں پراپیگنڈا کرنے کا بھی الزام عائد کیا گیا ہے۔

پولیس کا کہنا ہے کہ شدت پسندانہ روپے کو فروغ دینے والے ان افراد کو سوشل میڈیا پرکئی افراد فالو کر رہے تھے۔ متعلق ادارے اب تک یہ اندازہ نہیں لگا سکے کہ ان کا تعلق کسی بڑے انتہا پسند گروہ سے ہے یا نہیں۔

اس سال کے آغاز سے اسپین کی پولیس نے ایسے 29 افراد کو حراست میں لیا ہے جو یا تو داعش کا حصہ تھے یا اس گروہ کی حمایت میں کام کر رہے تھے۔

واضح رہے کہ تین روز قبل استنبول کے اتاترک ائیرپورٹ پر خودکش حملے میں 44 افراد ہلاک ہوگئے تھے۔ ترکی کی جانب سے کہا گیا ہے کہ یہ ہلاکت خیز حملہ ’اسلامک اسٹیٹ‘ کی کاروائی معلوم ہوتی ہے۔