افغانستان: امریکا کو جواب دہ بنایا جائے، چین کا مطالبہ

جنیوا شہر میں منعقد ہونے والے اقوام متحدہ کی انسانی حقوق کی کونسل کے اجلاس میں چین نے افغانستان میں امریکی اور اس کے اتحادیوں کی افواج کے قیام کے دوران ہونے والی انسانی حقوق کی مبینہ خلاف ورزیوں اور دوسرے منفی اقدامات کے تناظر میں ذمہ داری کے تعین کو اہم قرار دیا ہے۔

 غزہ تنازعہ: پاکستان کی درخواست پر انسانی حقوق کونسل کا اجلاس

کونسل کے اجلاس میں خطاب کرتے ہوئے چینی سفیر نے ایسے اقدامات کا ارتکاب کرنے پر امریکی فوج کے ساتھ ساتھ مغربی دفاعی اتحاد نیٹو کی رکن ریاستوں کی افواج پر ذمہ داری عائد کرنے کا مطالبہ کیا ہے۔

ذمہ داری کا تعین ضروری ہے

ہیومن رائٹس کونسل کے ہنگامی اجلاس میں چینی سفیر چن شو نے کہا کہ افغانستان میں سرزد کی جانے والی انسانی حقوق کی مبینہ  خلاف ورزیوں پر امریکا، برطانیہ، آسٹریلیا اور دوسرے ممالک کی افواج کا احتساب وقت کی ضرورت ہے۔ انہوں نے کہا کہ اس ہنگامی سیشن میں اس پہلو سے لیا جانے والا کوئی بھی فیصلہ ذمہ داری کے تعین کی سمت میں ایک اہم قدم ہو گا۔

فوج کشی کے بہانے

انسانی حقوق کی کونسل میں چینی سفیر چن شو نے اپنی تقریر کے دوران یہ بھی کہا کہ جمہوریت اور انسانی حقوق کا عَلم اٹھانے والے امریکا اور اتحادی ممالک کی افواج نے دوسرے ملکوں میں مداخلت کرنے کے بہانے تراش رکھے ہیں۔

میانمار میں تشدد جنوبی ایشا کو غیر مستحکم کر سکتا ہے، اقوام متحدہ 

انہوں نے یہ بھی کہا کہ فوج کشی کے بعد یہ اپنے اپنے حکومتی و انتظامی ماڈل ان ملکوں پر نافذ کرنے کی کوشش کرتے ہیں، جہاں کی زبانیں، ثقافتیں اور تاریخی پس منظر مختلف ہوتے ہیں۔ چن شو کے مطابق اس زور زبردستی سے ان ملکوں کی عوام کے مصائب اور تکالیف دگنا ہو جاتے ہیں، جن میں فوج کشی کی جاتی ہے۔

'طالبان کے مثبت اقدام تعریف کے مستحق ہیں‘

چین نے انٹرنیشل کمیونٹی سے کہا ہے کہ افغانستان پر کنٹرول حاصل کرنے والے طالبان پر پابندیاں عائد کرنے کے بجائے ان کی 'مثبت کوششوں‘ کی حمایت اور تعریف بہت ضروری ہے۔ چینی وزارتِ خارجہ کے ترجمان نے ایک بیان میں واضح کیا کہ افغانستان میں اب تک ہونے والے 'مثبت اور حوصلہ افزا فیصلے‘ بین الاقوامی کمیونٹی کی تعریف کے طلب گار ہیں۔

’پاکستان خود شیشے کے گھر میں رہتا ہے‘: اسرائیل کی تنقیدی ٹویٹ

اس بیان میں کہا گیا کہ طالبان کی جانب سے پرامن تعمیر نو کے عمل کا عزم مثبت سمت کا تعین اور عوام کی فلاح و بہبود میں اضافہ کرنے کی کوششیں بلاشبہ عالمی حمایت چاہتی ہیں۔

چینی وزارتِ خارجہ نے مزید کہا کہ ہر قدم پر پابندیاں عائد کرنے سے افغانستان کے مسائل حل نہیں ہوں گے بلکہ اس کے منفی اور خطرناک نتائج پیدا ہو سکتے ہیں۔ بیجنگ حکومت نے اس وقت بھی افغانستان کے دارالحکومت کابل میں اپنا سفارت خانہ بند کرنے کے بجائے کھلا رکھا ہوا ہے اور طالبان کے ساتھ دوستانہ تعلقات استوار کرنا چاہتی ہے۔

ع ح/ ا ا (روئٹرز، اے پی)