اقتصادی پابندیاں، روس کو سالانہ چالیس بلین ڈالر کا نقصان

روسی وزیر خزانہ آنتون سیلوآنوف نے کہا ہے یوکرائن تنازعے کی وجہ سے ماسکو حکومت پر عائد کی جانے والی پابندیوں کے نتیجے میں روس کو سالانہ چالیس بلین امریکی ڈالر کا نقصان ہو رہا ہے۔ نیوز ایجنسی اے ایف پی نے مقامی سرکاری نیوز ایجنسی کے حوالے سے بتایا ہے کہ ماسکو میں اکنامک فورم سے خطاب کرتے ہوئے سیلوآنوف نے کہا کہ تیل کی گرتی ہوئی قیمتوں کی وجہ سے بھی روسی اقتصادیات کو شدید نقصان ہو رہا ہے۔ ان کے مطابق بین الاقوامی منڈی میں تیل کی قیمتوں میں کمی سے حکومت کو نوے تا سو بلین امریکی ڈالر کے نقصان ہو رہا ہے۔

یہ امر اہم ہے کہ مشرقی یوکرائن کے بحران میں روس کے ملوث ہونے پر امریکا اور یورپی یونین نے ماسکو حکومت پر سخت اقتصادی پابندیاں عائد کی ہیں، جن کی وجہ سے روس میں افراط زر میں بھی اضافہ ریکارڈ کیا گیا ہے۔ ان پابندیوں میں روس کے توانائی کے علاوہ دفاع اور مالیات کے شعبوں کو بھی نشانہ بنایا گیا ہے۔

تاہم روسی صدر ولادیمیر پوٹن نے ان پابندیوں کے تناظر میں کہا ہے کہ ان سے معمولی نقصان تو ہو گا لیکن یہ تباہ کن ثابت نہیں ہوں گی۔ انہوں نے اتوار کے دن ایک نیوز ایجنسی سے گفتگو کرتے ہوئے یوکرائن کے تنازعے پر اپنی حکومت کے مؤقف کا دفاع کیا۔ انہوں نے کہا کہ اس تناظر میں روس کا لائحہ عمل ’درست‘ ہے اور ’اس کو سچ سے تقویت ملتی ہے‘۔

یہ امر اہم ہے کہ کییف اور مغربی ممالک کا الزام ہے کہ کریملن یوکرائن تنازعے میں منفی کردار ادا کر رہا ہے اور اس کا مقصد یوکرائن کو عدم استحکام کا شکار بنانا ہے۔ تاہم ماسکو حکومت ایسے الزامات مسترد کرتی ہے۔ ہفتے کے دن روسی وزیر خارجہ سرگئی لاوروف نے مغربی ممالک پر الزام عائد کیا کہ پابندیاں عائد کرتے ہوئے اور مظاہروں کو ہوا دیتے ہوئے روس میں حکومت تبدیل کرنے کی کوشش کی جا رہی ہے۔

مغربی پابندیوں کے جواب میں روسی حکومت نے بھی امریکا، کینیڈا، آسٹریلیا، ناروے اور یورپی یونین سے زیادہ تر خوراک کی مصنوعات درآمد کرنے پر پابندی عائد کر دی ہے، جس کی وجہ سے وہاں خوراک کی قیمتوں میں قابل ذکر اضافہ نوٹ کیا گیا ہے۔

ادھر خبر رساں ادارے اے ایف پی نے کییف سے موصولہ اطلاعات کے حوالے سے بتایا ہے کہ ملک کے مشرقی خطے ڈوینٹسک کے متعدد علاقوں میں روس نواز باغیوں اور یوکرائنی فورسز کے مابین تازہ جھڑپیں رونما ہوئیں ہیں جن کے نتیجے میں تین یوکرائنی فوجی ہلاک جبکہ چوبیس زخمی ہو گئے ہیں۔ ملکی فوج کے مطابق حکمت عملی کے حوالے سے اہم سمجھی جانے والے متعدد محاذوں پر باغیوں نے 56 حملے کیے ہیں۔

دریں اثناء باغیوں کے زیر قبضہ ڈونیٹسک کے میئر آفس کی طرف سے جاری کیے گئے بیان کے مطابق ویک اینڈ پر شروع ہونے والی شیلنگ کے نتیجے میں بارہ افراد زخمی ہو گئے ہیں۔ مزید کہا گیا ہے کہ یوکرائنی فورسز کی اس کارروائی میں متعدد گیس پائب لائنوں کو بھی نقصان پہنچا ہے، جس کی وجہ سے پانچ ہزار مکانات شدید سردی کے موسم میں گیس سے محروم ہو گئے ہیں۔