اقوام متحدہ میں فلسطینیوں کی نئی حیثیت پر عالمی ردِ عمل

اقوام متحدہ میں روس کے سفیر وٹالی چرکن نے کہا کہ فلسطینیوں کے لیے اقوام متحدہ میں غیر رکن مبصر کی حیثیت ایک بڑا قدم اور محمود عباس کے لیے بڑی کامیابی ہے۔

امریکی وزیر خارجہ ہلیری کلنٹن نے اسے بدقسمتی قرار دیا ہے۔ اقوام متحدہ میں امریکی سفیر سوزن رائس نے اپنی حکومت کے اس مؤقف کا اعادہ کیا کہ فلسطینیوں کے لیے اقوام متحدہ کی مکمل رکنیت کی حمایت نہیں کی جائے گی۔ ان کا کہنا ہے کہ یہ معاملہ سلامتی کونسل کے سامنے پیش کیا گیا تو امریکا اپنا ویٹو کا حق استعمال کرے گا۔

اقوام متحدہ میں اسرائیلی سفیر ران پروسور کا کہنا تھا کہ اسرائیل امن چاہتا ہے اور اس نے ہمیشہ اس سلسلے ميں ہاتھ آگے بڑھایا ہے لیکن جواب میں اسے تشدد اور دہشت گردی ملی ہے۔

اسرائیلی وزیر اعظم بینجمن نیتن یاہو نے اقوام متحدہ کی جنرل اسمبلی میں ہونے والی ووٹنگ کو مسترد کرتے ہوئے اسے بے معنی قرار دیا ہے۔ ان کا کہنا ہے کہ اس سے زمینی حقائق نہیں بدلیں گے۔ انہوں نے یہ بھی کہا کہ امن براہ راست مذاکرات کے ذریعے ہی ممکن ہو سکتا ہے نہ کہ اقوام متحدہ کے یکطرفہ فیصلوں سے۔

اس کے برعکس فلسطینی اتھارٹی کے صدر محمود عباس کا کہنا ہے کہ اقوام متحدہ کے اس فیصلے سے امن کی کوششوں کی حوصلہ افزائی ہو گی۔ ان کا یہ بھی کہنا تھا کہ اسرائیل کے ساتھ امن و سلامتی کے ساتھ رہا جا سکتا ہے۔

ایران نے فلسطینیوں کے لیے اس پیش رفت کا خیر مقدم کرتے ہوئے اسے مثبت قرار دیا ہے۔ ایران کے نائب وزیر خارجہ حسین امیر عبداللہیان کا کہنا ہے کہ تہران حکومت اس پیش رفت کو فلسطینیوں کو مکمل خودمختاری ملنے کی جانب پہلا قدم خیال کرتی ہے۔

حماس کے رہنما خالد مشعل نے کہا ہے کہ فلسطینیوں کو ملنے والی اقوام متحدہ کے غیر رکن مبصر کی حیثیت اور اسرائیل کے ساتھ غزہ کے حالیہ تنازعے کو واحد اور بے باک حکمتِ عملی کے طور پر دیکھا جانا چاہیے جو تمام فلسطینیوں کو خود مختار بنا سکتی ہے۔

ویٹی کن نے بھی اس پیش رفت کا خیر مقدم کیا ہے۔ برطانیہ نے امریکا پر زور دیا ہے کہ وہ اسرائیل اور فلسطینیوں کے درمیان مذاکرات کی بحالی کے لیے اپنا اثر و رسوخ استعمال کرے۔ واشنگٹن حکومت نے بھی فریقین کے درمیان براہ راست مذاکرات پر زور دیا ہے۔

نیتن یاہو کے حامی اخبار ہایوم نے لکھا ہے: ’’اسرائیل: اقوام متحدہ نے دہشت کو انعام سے نوازا ہے۔‘‘

نیویارک میں قائم گلوبل پالیسی فورم کے ایگزیکٹو ڈائریکٹر جیمز اے پال نے خبر رساں ادارے آئی پی ایس سے بات کرتے ہوئے کہا کہ اس قرارداد سے فلسطینیوں کے مسائل حل نہیں ہوں گے لیکن یہ ایک دلچسپ پیش رفت ضرور ہے۔ انہوں نے کہا کہ اس سے غزہ کے حالیہ واقعات کے بعد حکومتوں کی سطح پر نئی سوچ کی عکاسی ہوتی ہے۔

فلسطینیوں کی اس حیثیت کے لیے اقوام متحدہ کی جنرل اسمبلی میں ووٹنگ جمعرات کو ہوئی۔ ان کی حمایت میں 138ووٹ پڑے جبکہ نو ووٹ مخالفت میں ڈالے گئے۔ اکتالیس ملکوں نے اپنا حقِ رائے دہی محفوظ رکھا۔

ng/as (Reuters, AFP, dpa, IPS)