الاذقیہ میں کارروائی، فلسطینی مہاجرین کیمپ چھوڑنے پر مجبور

پیر کے روز اس شہر کے رہائشیوں نے خبر رساں اداروں کو بتایا کہ ملکی فوج بھاری مشین گنوں اور ٹینکوں کا استعمال کرتے جاری رکھے ہوئے ہے۔ فلسطینی مہاجرین کے لیے کام کرنے والے اقوام متحدہ کی ایجنسی کے ایک ترجمان کرس گنیس نے کہا کہ حکومتی گولہ باری کے نتیجے میں پانچ سے دس ہزار فلسطینی مہاجرین کیمپ چھوڑ کر فرار ہو گئے ہیں۔ یہ فلسطینی کیمپ شہر کے الرمل علاقے میں واقع ہے۔

خبر رساں ادارے روئٹرز کے مطابق تازہ واقعات میں ہلاک ہو نے والوں کی تعداد چھ ہے۔ اس طرح حالیہ چند روز میں اس شہر میں ہلاک ہونے والوں کی تعداد بڑھ کر 34 ہو گئی ہے۔ ایک تاجر نے نام ظاہر نہ کرنے کی شرط پر کہا کہ گھر بار چھوڑنے والے افراد محاصرے کی وجہ سے شہر چھوڑنے سے قاصر ہیں، تاہم وہ شہر کے ایک حصے سے دوسرے حصے میں نقل مکانی کر سکتے ہیں۔

خبر رساں ادارے روئٹرز کے مطابق اسد حکومت تمام ان علاقوں اور قصبوں میں فوجی آپریشن مزید سخت اور وسیع کرتی جا رہی ہے، جہاں اقلیتی علوی فرقے کے مسلمان مئی کے وسط سے احتجاج جاری رکھے ہوئے ہیں۔ یکم رمضان سے41 سالہ بشار الاسد حکومت کے خلاف ان احتجاجی مظاہروں میں شدت دیکھنے میں آئی ہے۔ اسد حکومت مشرقی شہر دیر الزور اور ترکی کی سرحد سے ملحق شمال مغربی شہروں میں بھی آپریشن جاری رکھے ہوئے ہے۔

ترک وزیر خارجہ احمد داؤد اوگلو نے اسد حکومت سے فوری طور پر فوجی آپریشن روکنے کے لیے کہا ہے۔ ان کا کہنا تھا، ’’شامی حکام کے لیے یہ ہمارے آخری الفاظ ہیں۔ ہماری پہلی امید یہی ہے کہ جاری فوجی کارروائیوں کو فوری طور پر روک دیا جائے۔‘‘ ان کا کہنا تھا کہ یہ شام کے مضبوط اتحادی اور ہمسائے کی طرف سے شدید ترین احتجاج ہے۔

ترک دارالحکومت انقرہ میں مبہم الفاظ میں ان کا کہنا تھا، ’’اگر یہ آپریشن بند نہیں کیا گیا تو ان اقدامات کے بارے میں کہنے کو کچھ بھی نہیں بچے گا، جو اٹھائے جائیں گے۔‘‘ ترک وزیر خارجہ گزشہ ہفتے مذاکرات کے لیے شام بھی گئے تھے۔

رپورٹ: امتیاز احمد

ادارت: شامل شمس