الجزیرہ کی صحافی اسرائیلی فورسز کی فائرنگ میں ہلاک

فلسطینی وزارت صحت نے بتایا کہ معروف صحافی شیریں ابو عاقلہ بدھ کے روز مقبوضہ مغربی کنارے کے جنین شہر میں اسرائیلی فوج کی جانب سے فلسطینی کیمپوں پر مارے جانے والے چھاپے کی کارروائی کی کوریج کررہی تھیں۔ اس دوران اسرائیلی فورسز کی جانب سے کی جانے والی فائرنگ میں ایک گولی انہیں لگ گئی۔ انہیں نازک حالت میں ہسپتال لے جایا گیا جہاں وہ چل بسیں۔

الجزیرہ سے وابستہ صحافی ندا ابراہیم نے بتایا کہ گوکہ موت کا سبب ابھی واضح نہیں ہے لیکن اس واقعے کے ویڈیو میں دیکھا جاسکتا ہے کہ ایک گولی شریں ابو عاقلہ کے سر میں لگی۔

انہوں نے فلسطینی شہر رملہ سے خبر رساں ایجنسیوں کو فون پر بتایا،"فی الحال ہمیں صرف یہی معلوم ہے کہ فلسطینی وزارت صحت نے ان کی موت کا اعلان کر دیا ہے۔ شیریں ابو عاقلہ جنین میں اسرائیلی چھاپے ماری کی کارروائیوں کی کوریج کررہی تھیں کہ ان کے سر میں ایک گولی لگ گئی۔"

انہوں نے مزید کہا،"آپ تصور کرسکتے ہیں کہ جوصحافی ان کے ساتھ کام کر رہے تھے ان کے لیے یہ کتنا بڑا صدمہ ہے۔"  انہوں نے بھرائی آواز میں کہا کہ ابو عاقلہ ایک انتہائی قابل احترام صحافی تھیں۔ وہ سن 2000سے الجزیرہ کے ساتھ کام کر رہی تھیں۔

فلسطینی وزارت صحت کے مطابق ایک دیگر فلسطینی صحافی علی سمودی کو بھی پیٹھ میں گولی لگی ہے۔ ان کی حالت فی الحال مستحکم بتائی جاتی ہے۔ سمودی یروشلم سے شائع ہونے والے قدس اخبار کے لیے کام کرتے ہیں۔

اسرائیل کا ردعمل

فلسطینی وزارت صحت نے بتایا کہ ویڈیو فوٹیج سے صاف پتہ چلتا ہے کہ ابو عاقلہ نے ایک نیلا جیکٹ پہن رکھا تھا جس پر نمایاں طورپر 'پریس' لکھا ہوا تھا۔

اسرائیلی فوج نے کہا کہ جس وقت اس کی فورسز جنین میں کارروائی کررہی تھی اس دوران اس پر بندوقوں اور دھماکہ خیز اشیاء سے حملے کیے گئے جس کے جواب میں اسے گولی چلانی پڑی۔

اسرائیلی فوج نے اپنے بیان میں کہا،" اس واقعے کی تفتیش کی جارہی ہے اور اس امکان پر بھی غور کیا جارہا ہے کہ ہوسکتا ہے صحافی فلسطینی بندو ق برداروں کی فائرنگ کا نشانہ بن گئے ہوں۔"

خیال رہے کہ اسرائیل الجزیرہ کی رپورٹنگ کی ہمیشہ نکتہ چینی کرتا رہا ہے تاہم اسرائیلی حکام اس کے صحافیوں کو اپنی ذمہ داریاں ادا کرنے کی اجازت بالعموم دیتے رہے ہیں۔

الجزیرہ کے ایک نامہ نگار گیوارا بودیری کو گزشتہ برس یروشلم میں ایک احتجاجی مظاہرے کے دوران حراست میں لے لیا گیا تھا۔ اس دوران ان کا ہاتھ ٹوٹ گیا تھا۔ الجزیرہ نے اپنے صحافی کے ساتھ اسرائیلی پولیس کے غلط سلوک کا الزام لگایا تھا۔

 ج ا/  ص ز  (اے پی، روئٹرز، ڈی پی اے)