القاعدہ امریکہ کے لیے بدستور حقیقی خطرہ ہے، پنیٹا

امریکی وزیر دفاع لیون پنیٹا نے یہ بات بدھ کو رات گئے ایک ٹیلی وژن انٹرویو میں کہی۔ یہ انٹرویو اتوار کو نشر کیا جائے گا۔ خبر رساں ادارے اے ایف پی کے مطابق سی بی ایس نیوز نے لیون پنیٹا کے اس انٹرویو کے بعض حصے جاری کیے ہیں، جن میں پینٹاگون کے سربراہ نے القاعدہ کے عالمی نیٹ ورک کو توڑنے کے لیے امریکی حکمت عملی پر بات چیت کی ہے۔

اس انٹرویو میں پنیٹا نے کہا ہے: ’’ہم القاعدہ کے (کارکنوں کے) پیچھے ہیں، وہ جہاں بھی ہیں۔‘‘

انہوں نے مزید کہا: ’’اور واضح طور پر، ہمیں پاکستان میں القاعدہ کا سامنا ہے۔ ہمیں یمن، صومالیہ اور شمالی افریقہ میں القاعدہ کا سامنا ہے، اور ظاہر ہے کہ القاعدہ کے ان سب رابطوں سے، جو افغانستان میں ملوث ہیں۔‘‘

پنیٹا سے جب پوچھا گیا کہ کیا امریکی فورسز نے القاعدہ کو شکست دے دی ہے تو انہوں نے کہا: ’’ابھی نہیں، وہ ابھی تک حقیقی خطرہ ہے۔ القاعدہ ابھی بھی موجود ہے۔ اور وہ جہاں بھی ہیں، ہمیں ان پر دباؤ برقرار رکھنا ہے۔‘‘

پنیٹا نے یہ بھی کہا کہ امریکی فورسز نے بہرحال القاعدہ کی قیادت کو بڑی حد تک نقصان پہنچایا ہے۔

امریکہ میں گیارہ ستمبر کے حملوں کے بعد اس دہشت گرد نیٹ ورک کے جن دس رہنماؤں کے نام سامنے آئے، ان میں سے صرف ایک، ایمن الظواہری ہی زندہ ہے، جو القاعدہ کا موجودہ سربراہ بھی ہے۔ اس نے گزشتہ برس پاکستانی علاقے ایبٹ آباد میں اسامہ بن لادن کی امریکی فورسز کے خفیہ آپریشن میں ہلاکت کے بعد اس گروہ کی قیادت سنبھالی۔

گزشتہ برس القاعدہ کے بیس مرکزی رہنماؤں میں سے آٹھ کو ہلاک کیا گیا، ان میں سے بیشتر امریکی ڈرون حملوں کا نشانہ بنے۔

خیال رہے کہ لیون پنیٹا امریکی خفیہ ادارے سی آئی اے کے سابق سربراہ ہیں۔ انہوں نے گزشتہ برس جولائی میں امریکی وزیر دفاع کے عہدے پر رابرٹ گیٹس کی جگہ لی تھی۔

رپورٹ: ندیم گِل / خبررساں ادارے

ادارت: عدنان اسحاق