امریکا کی جانب سے بشار الاسد کے فیصلے کا خیر مقدم

دمشق کے کیمیائی ہتھیار شام کے اپنے اہلکار تلف کر رہے ہیں جن کی نگرانی ہتھیاروں کی تخفیف سے متعلق بین الاقوامی ماہرین کر رہے ہیں۔ یہ عمل اقوام متحدہ کی سلامتی کونسل کی ایک قرار داد کے تحت جاری ہے۔

شام کے صدر بشار الاسد کے لیے مثبت رائے کا اظہار امریکی وزیر خارجہ جان کیری نے پیر کو انڈونیشیا کے علاقے نوسا دعا میں اپنے روسی ہم منصب سیرگئی لاوروف سے ملاقات کے بعد کیا۔ دونوں رہنماؤں نے ایک مشترکہ نیوز کانفرنس سے خطاب کیا۔ اس موقع پر جان کیری نے کہا: ’’یہ عمل ریکارڈ ٹائم میں شروع ہوا ہے اور ہم روس کے تعاون اور ظاہر ہے شام کی جانب سے اس پر عمل کرنے کا خیر مقدم کرتے ہیں۔‘‘

انہوں نے کہا: ’’میرے خیال میں یہ انتہائی اہم ہے کہ قرار داد منظور کیے جانے کے ایک ہفتے کے اندر کل اتوار کو کچھ کیمیائی ہتھیاروں کی تلفی کا عمل شروع ہو گیا۔‘‘

جان کیری نے کہا ہے کہ اس کے لیے اسد حکومت تعریف کی مستحق ہے۔ ان کا کہنا تھا: ’’یہ اچھا آغاز ہے اور ہم ایک اچھے آغاز کا خیر مقدم کرتے ہیں۔‘‘

اقوام متحدہ کی سلامتی کونسل کی ایک قرار داد کے تحت شام کے کیمیائی ہتھیاروں کی تیاری کے مراکز کو یکم نومبر تک ختم کیا جانا ہے۔ کیمیائی ہتھیاروں کی مکمل تلفی کے لیے آئندہ برس کے وسط تک کا وقت طے ہے۔

اقوام متحدہ اور کیمیائی ہتھیاروں سے متعلق عالمی ادارے او پی سی ڈبلیو نے اتوار کو ایک بیان میں کہا تھا کہ معائنہ کار شام کے کیمیائی ہتھیاروں کی تفصیلات جانچ رہے ہیں اور ان ہتھیاروں کو تلف کرنے کے عمل کی نگرانی کر رہے ہیں۔

دوسری جانب جرمن میگزین ڈیر اشپیگل کے ساتھ ایک انٹرویو میں شام کے صدر بشار الاسد نے کہا ہے کہ ان کی حکومت معائنہ کاروں کے ساتھ انتہائی شفاف طرزِ عمل اخیتار کیے ہوئے ہے۔

انہوں نے کہا تھا: ’’ماہرین کسی بھی جگہ جا سکتے ہیں۔ انہیں ہماری طرف سے تمام ڈیٹا دستیاب ہو گا، وہ اسے جانچیں گے اور پھر وہ ہماری صداقت کے بارے میں فیصلہ کر سکتے ہیں۔‘‘

بشار الاسد نے یہ بھی تسلیم کیا کہ شام میں جاری طویل تنازعے میں ان کی حکومت سے کچھ غلطیاں سرزد ہوئی ہیں۔ اس کے ساتھ ہی انہوں نے ایک مرتبہ پھر کہا کہ دمشق کے ایک نواحی علاقے میں 21 اگست کے کیمیائی حملے میں ان کی فورسز ملوث نہیں تھیں۔