امریکی انتخابات: ڈونلڈ ٹرمپ نے اپنی فتح کا اعلان کر دیا

ریپبلکن پارٹی کے صدارتی امیدوار ڈونلڈ ٹرمپ نے 2024 کے امریکی صدارتی انتخابات میں پہلی تین اہم ریاستیں جیت لی ہیں اور دعویٰ کیا کہ انھوں نے مجموعی انتخابات میں نائب صدر کملا ہیرس کو شکست دے دی ہے۔

ٹرمپ نے پینسلوینیا، نارتھ کیرولائنا اور جارجیا کی سوئنگ ریاستوں میں کامیابی حاصل کی اور اب انہیں 47 ویں امریکی صدر بننے کے لیے صرف تین الیکٹورل ووٹوں کی ضرورت ہے۔

امریکی صدارتی الیکشن: ٹرمپ جیت کے قریب تر

پام بیچ میں اپنی 'وکٹری اسپیچ' دیتے ہوئے ٹرمپ نے کہا کہ انہوں نے ایک ایسی فتح حاصل کی ہے جسے امریکہ نے کبھی نہیں دیکھا ہے۔ ان کا کہنا تھا کہ امریکی شہریوں نے انھیں غیرمعمولی مینڈیٹ دیا ہے۔

'اب امریکہ کا سنہری دور ہو گا'

ٹرمپ نے کہا کہ انھیں امید ہے کہ جب ان کے ووٹر ماضی میں مڑ کر دیکھیں گے تو یہ دن ان کی زندگی کے سب سے اہم دنوں میں سے ایک ہو گا۔ انہوں نے کہا کہ ان کا اگلا دور امریکہ کا 'سنہری دور‘ ہو گا۔

ٹرمپ کا کہنا تھا کہ یہ امریکہ کے شہریوں کی'شاندار فتح‘ ہے۔ انھوں نے اپنی مہم کے نعرے ’آئیں امریکہ کو پھر سے عظیم بنائیں‘ کا استعمال کرتے ہوئے کہا کہ اس فتح کے بعد ہم امریکہ کو ایک بار پھر عظیم بنانے کے قابل ہوں گے۔

امریکی صدارتی انتخابات، واشنگٹن میں سخت ترین حفاظتی اقدامات

دوسری بار امریکی صدر منتخب ہونے والے ڈونلڈ ٹرمپ نے کہا کہ یہ ملکی تاریخ کی عظیم ترین سیاسی تحریک تھی، امریکہ کو بہتر کرنے کی ضرورت ہے، ہم اسے بہتر کریں گے، امریکہ کے زخموں پر مرہم رکھیں گے۔ امریکہ کو مضبوط بنانے تک چین سے نہیں بیٹھیں گے۔

غیرقانونی تارکین وطن کو وارننگ

ٹرمپ نے سرحدوں کو ٹھیک کرنے کا عزم کیا۔ ان کا کہنا تھا کہ "سرحدوں کو سیل کرنا پڑے گا، ہم چاہتے ہیں کہ لوگ قانونی طریقے سے امریکہ آئیں، امریکہ کو محفوظ بنائیں گے۔ چیلنجز سے نمٹنے کے لیے اقدامات کریں گے، امریکہ کے تمام معاملات اب ٹھیک ہونے والے ہیں، اس وقت تک خاموش نہیں بیٹھیں گے جب تک لوگوں کے خواب پورے نہ کردوں۔"

ڈونلڈ ٹرمپ نے کہا، "ہم مضبوط اور طاقتور فوج چاہتے ہیں اور آئیڈل صورتحال ہے کہ ہمیں اسے استعمال کرنے کی ضرورت نہ پڑے، آپ جانتے ہیں کہ اپنے سابقہ 4 سال میں ہماری کوئی جنگ نہیں تھی، سوائے اس کے کہ ہم نے داعش کو شکست دی تھی، ہم نے داعش کو ریکارڈ مدت میں شکست دی، لیکن ہماری کوئی جنگ نہیں تھی۔"

عالمی رہنماؤں کی طرف سے مبارک بادیوں کا سلسلہ شروع

امریکی نشریاتی ادارے 'فوکس نیوز ' کے مطابق ڈونلڈ ٹرمپ نے 267 الیکٹورل ووٹ حاصل کیے جب کہ کملا ہیرس اب تک 224 الیکٹورل ووٹ حاصل کرنے میں کامیاب رہی ہیں۔

دریں اثنا عالمی رہنماؤں کی جانب سے ڈونلڈ ٹرمپ کو ان کی کامیابی پر مبارک باد دینے کا سلسلہ شروع ہو گیا ہے۔

بھارتی وزیر اعظم نریندر مودی، اسرائیلی وزیر اعظم بینجمن نیتن یاہو، فرانس کے صدر امانوئل ماکروں، یوکرین کے صدر ولادیمیر زیلینسکی، اٹلی کی وزیر اعظم جارجیا میلونی، ہنگری کے وزیر اعظم وکٹر اوربان نے انہیں مبارک باد دی ہے۔

پاکستان کے وزیر اعظم شہبا‍ز شریف نے بھی ٹرمپ کی "تاریخی کامیابی" پر انہیں مبارک باد دی ہے۔

ج ا ⁄ ص ز ( اے پی، اے ایف پی، روئٹرز، ڈی پی اے)