اندرون ملک بے گھر افراد کی تعداد میں ریکارڈ اضافہ

یوکرین سمیت مختلف ممالک میں جاری مسلح تنازعات اور قدرتی آفات کی وجہ سے عالمی سطح پر داخلی طور پر بے گھر ہونے والے افراد کی تعداد اکہتر ملین سے تجاوز کر گئی ہے۔

نیا ریکارڈ: دنیا بھر میں سات کروڑ انسان جنگوں کے باعث بے گھر

جرمنی سے گزشتہ برس چوبیس ہزار تارکین وطن ملک بدر کیے گئے

ناروے میں قائم ریفیوجی کونسل کےاندرون ملک بے گھر ہونے والے افراد کی نگرانی کے مرکز کے مطابق گزشتہ برس دنیا کے مختلف ممالک میں داخلی طور پر نقل مکانی پر مجبور ہو جانے والے افراد کی تعداد اکہتر اعشاریہ ایک ملین رہی۔ بتایا گیا ہے کہ دو ہزار بائیس کے آخر میں یوکرین میں پانچ اعشاریہ نو ملین افراد کو اندرون ملک ہجرت کرنا پڑی۔ اس عالمی ادارے کےمطابق دو ہزار اکیس کے مقابلے میں گزشتہ برس مسلح تنازعات کی وجہ سے داخلی طور پر بے گھر ہو جانے والے افراد کی تعداد میں سترہ فیصد کا اضافہ دیکھا گیا۔

اس ادارے کا کہنا ہے کہ شام میں چھ اعشاریہ آٹھ ملین افراد گزشتہ ایک دہائی سے زائد عرصے سے جاری خانہ جنگی کی وجہ سے داخلی طور پر بے گھر ہیں۔ نارویجین ریفیوجی کونسل کے مطابق قدرتی آفات کی وجہ سے ہجرت پر مجبور ہونے والے افراد کو بھی شامل کر لیا جائے تو دو ہزار اکیس کے مقابلے میں گزشتہ برس تعداد میں یہ اضافہ بیس فیصد بنتا ہے۔

واضح رہے کہ داخلی طور پر بے گھر سے مراد لوگوں کا جبراﹰ اپنے ہی ملک میں کسی ایک مقام سے دوسرے مقام کی جانب ہجرت کر جانا ہے۔ یوکرین، شام، ایتھوپیا اور دیگر ممالک میں گزشتہ برس لاکھوں افراد کو داخلی طور پر بے گھر ہونے کے المیے کا سامنا رہا۔

رواں برس سوڈان میں مسلح افواج اور پیراملٹری فورسز کے درمیان شروع ہونے والی لڑائی کے بعد بھی لاکھوں افراد ہجرت پر مجبور ہو چکے ہیں۔ اقوام متحدہ کے مطابق سوڈان میں چند ہفتوں قبل شروع ہونے والی اس خونریز لڑائی نے اب تک ساتھ لاکھ افراد کو داخلی طور پر ہجرت پر مجبور کر دیا ہے۔

اس رپورٹ میں بتایا گیا ہے کہ پاکستان، نائجیریا اور برازیل سمیت متعدد ممالک میں شدید سیلابوں کی وجہ سے گزشتہ دو برسوں میں داخلی ہجرت میں اضافہ دیکھا گیا ہے۔ جب کہ صومالیہ، کینیا اور ایتھوپیا میں بدترین خشک سالی کی وجہ سے لاکھوں افراد نقل مکانی پر مجبور ہوئے ہیں۔

مہیما کپور  (ع ت، ش ر)