انسانوں کے اسمگلروں کے خلاف جنگ، یورپی رہنما متحد

جرمن خبر رساں ادارے ڈی پی اے کی برسلز سے موصولہ رپورٹوں میں بتایا گیا ہے کہ اٹھائیس ممالک پر مشتمل یورپی یونین کے وزرائے خارجہ اور دفاع آج اٹھارہ مئی بروز پیر ایک ملاقات میں اس حوالے سے ایک منصوبے کو حتمی شکل دے دیں گے۔ اس منصوبے کا مقصد سمندری راستوں سے یورپ پہنچنے کی کوشش کرنے والے غیر قانونی تارکین وطن کی جانوں کے ضیاع کو روکنا ہے۔

یہ امر اہم ہے کہ شمالی افریقی ملک لیبیا سے یورپ پہنچنے کی کوشش میں خستہ حال اور گنجائش سے زیادہ افراد سے لدی متعدد کشتیاں بحیرہء روم کے پانیوں میں حادثات کا شکار ہو جاتی ہیں۔ رواں برس ایسے حادثات کے نتیجے میں کم ازکم اٹھارہ سو تارکین وطن لقمہ اجل بن چکے ہیں۔ 2014ء کے مقابلے میں یہ تعداد بیس گنا زیادہ ہے۔

آج پیر کے دن یورپی رہنما اس صورتحال سے نمٹنے کے لیے مختلف منصوبوں پر غور کر رہے ہیں۔ ان میں یہ تجویز بھی شامل ہے کہ ایسی خالی کشتیوں کو ان کی نشاندہی ہوتے ہی عسکری کارروائی کرتے ہوئے تباہ کر دیا جائے، جن کے ذریعے انسانوں کی اسمگلنگ کی جاتی ہے۔ اس تناظر میں یورپی ممالک اپنے انٹیلی جنس آپریشنز کو بھی بہتر بنائیں گے۔

یورپی یونین کے خارجہ امور کی نگران فیڈریکا موگیرینی نے کہا ہے کہ برسلز میں آج ہونے والی اس میٹنگ میں بنیادی منصوبوں پر اتفاق رائے کے نتیجے میں آئندہ کی حکمت عملی طے کرنے میں بھی مدد مل سکے گی۔ تاہم ابھی تک یورپی یونین کے اس مجوزہ مشن کے حوالے سے کئی معاملات پر متعدد سوالیہ نشان لگے ہوئے ہیں، مثال کے طور پر یہ کہ اقوام متحدہ کی سلامتی کونسل اس حوالے سے یورپی یونین کو کیا مینڈیٹ دیتی ہے یا پھر یہ کہ آیا لیبیا کی قیادت تعاون پر تیار ہو جائے گی، وغیرہ وغیرہ۔ تاہم موگیرینی کے بقول یورپی یونین کی طرف سے اس منصوبے پر متفق ہو جانے کے بعد سلامتی کونسل بھی اس بارے میں زیادہ تیزی اور سنجیدگی سے سوچے گی۔

ادھر لیبیا میں مغربی دنیا کی حمایت یافتہ حکومت کے لیے اقوام متحدہ کے مندوب ابراہیم الدباشی یورپی یونین کے اس منصوبے کے بارے میں شکوک کا شکار ہیں۔ انہوں نے کہا ہے کہ عسکری آپریشن کے نتیجے میں لیبیا کی خود مختاری اور سالمیت کی خلاف وزری ہو گی جبکہ کشتیوں کو تباہ کرنے کے نتیجے میں ماہی گیروں کا روزگار بھی متاثر ہو سکتا ہے، ’’یہ انتہائی مشکل کام ہے کہ ماہی گیروں اور اسمگلروں کی کشتیوں کے مابین تخصیص کی جا سکے۔ یہ مجوزہ منصوبہ ماہی گیروں کے لیے تباہ کن ثابت ہو سکتا ہے۔‘‘

یورپی یونین کے وزرائے دفاع اور خارجہ کے اجلاس سے قبل جرمن وزیر دفاع اُرزُولا فان ڈئر لائن نے برسلز میں صحافیوں سے گفتگو کرتے ہوئے کہا، ’’ابھی بہت سے مشکل سوالات کے جوابات تلاش کرنا باقی ہے۔ کئی قانونی پیچیدگیاں بھی ہیں۔ فی الحال ہماری اولین ترجیح سمندری پانیوں میں حادثات کا شکار ہونے والے غیر قانونی تارکین وطن کو زندہ بچانا ہے۔‘‘