انٹرنیشنل ہیلتھ ایمرجنسی کیسز، عالمی ادارہ صحت دباؤ میں

عالمی ادارہ صحت کے لیے اس نئی تشویش کی وجہ بار بار سامنے آنے والے انٹرنیشنل ہیلتھ ایمرجنسی کے واقعات ہیں۔ اقوام متحدہ کے ایک سینیئر مشیرکا کہنا ہے کہ ان عالمی یا بین الاقوامی وباؤں کی وجہ سے عالمی ادارہ صحت (ڈبلیو ایچ او) صحت عامہ کے شعبے میں کئی مرتبہ جن ہنگامی حالات کا اعلان کرنے پر مجبور ہوا، ان کے باعث خود اس ادارے پر پڑنے والا بوجھ اور زیادہ ہو گیا ہے۔

منکی پاکس: امریکہ نے ہیلتھ ایمرجنسی کا اعلان کر دیا

ڈبلیو ایچ او کے سالانہ اجلاس سے خطاب کرتے ہوئے اس ادارےکے ہنگامی ردعمل کا جائزہ لینے والی کمیٹی کے سربراہ پروفیسر ولید عمار نے کہا کہ دنیا بھر صحت کی صورت حال کے باعث ڈبلیو ایچ او سے مسلسل بڑھتے ہوئے مطالبات کے نتیجے میں دستیاب فنڈز اور عملے کے مابین خلیج اور وسیع ہوتی جا رہی ہے۔

انہوں نے کہا، ''پروگرام بہت زیادہ پھیلا ہوا ہے کیونکہ مطالبات صرف ہنگامی حالات کی کثرت اور پیچیدگی کے ساتھ بڑھے ہیں۔''

اس کمیٹی کی ایک رپورٹ میں کہا گیا ہے کہ اس سال مارچ تک ڈبلیو ایچ او صحت کی 53 اعلیٰ سطحی ایمرجنسیز کا جواب دے رہا تھا۔ ان میں کووڈ انیس، ہیضہ اور ماربرگ وائرس پھیلنے جیسی وبائی بیماریاں بھی شامل تھیں۔ ان کے علاوہ اس عالمی ادارے کو ترکی اور شام میں زلزلے اور پاکستان میں تباہ کن سیلابوں جیسے انسانی بنیادوں پر ہنگامی حالات کا سامنا بھی رہا۔

اس رپورٹ میں یہ بھی بتایا گیا ہے کہ موسمیاتی تبدیلیاں سیلابوں اور طوفانوں جیسے قدرتی واقعات کی تعداد اور تواتر میں بھی اضافہ کر رہی ہیں اور ان سب کے نتائج سے صحت کا شعبہ بھی متاثر ہوتا ہے۔

دوسری طرف یہ بات بھی اہم ہے کہ 2022-2023 کے لیے ڈبلیو ایچ او کا ایمرجنسی پروگرام اپنے بنیادی بجٹ کا صرف 53 فیصد کے قریب حصہ ہی حاصل کر سکا ہے۔ اسی لیے اس حوالے سے رپورٹ میں مزید مستحکم فنڈنگ کا مطالبہ بھی کیا گیا ہے۔

ڈبلیو ایچ او اور اس کے رکن ممالک اس بات کو بہتر بنانے کی کوشش بھی کر رہے ہیں کہ وہ صحت کی کسی بھی ہنگامی صورت حال کے ساتھ کس طرح نمٹیں اور  ڈبلیو ایچ او کی مالی اعانت میں اضافے کے مزید کون کون سے طریقے استعمال کریں۔ اس ضمن میں پیر 22 مئی کو رکن ممالک نے ایک نیا بجٹ بھی منظور کیا، جس میں ان کی طرف سے لازمی مالی ادائیگیوں میں 20 فیصد اضافہ بھی شامل تھا۔

اس رپورٹ میں ڈبلیو ایچ او سے اپنی کارکردگی میں مزید بہتری لانے کا مطالبہ بھی کیا گیا ہے۔

ش ر⁄  م م (روئٹرز)