اٹلی کی بندرگاہیں غیر ملکی امدادی بحری جہازوں پر بھی بند

یورپی یونین ممالک کے غیر ملکی بحری جہاز اور نیٹو کے سپانسر کردہ امدادی مشن عموماﹰ سمندر میں ڈوبنے والے تارکین وطن کو اٹلی کے ساحلوں پر منتقل کیا کرتے ہیں۔

اتوار آٹھ جولائی کو آئر لینڈ کی بحریہ کا ایک جہاز ’سیموئیل بکٹ‘ ایک سو چھ مہاجرین کو لے کر سِسلی کی بندرگاہ پر لنگر انداز ہوا تھا۔

اطالوی وزیر داخلہ ماتیو سالوینی نے سوشل میڈیا پر اپنے فیصلے کا اعلان کرتے ہوئے کہا کہ وہ آسٹریا میں ہونے والی یورپی یونین سمٹ میں اپنے ہم منصب افراد کو اس اقدام سے آگاہ کر دیں گے۔

سالوینی نے سوشل میڈیا پر اپنی پوسٹ میں تحریر کیا،’’بدقسمتی سے اٹلی نے گزشتہ پانچ برسوں میں کچھ معاہدوں پر دستخط کیے۔ جن کے بدلے میں کچھ نہیں مانگا گیا۔ اسی لیے مہاجرین کے بحری جہاز انہیں لے کر اٹلی کی بندرگاہوں پر پہنچتے ہیں۔ لیکن ہماری حکومت میں یہ مشق دہرائی نہیں جائے گی۔‘‘

سالوینی نے تو اپنی پوسٹ میں نیٹو یا یورپی یونین ممالک میں سےکسی مشن کے جہاز کا نام لے کر تذکرہ نہیں کیا تاہم اطالوی وزیر ٹرانسپورٹ ڈینیلو تونینیلی نے ایک ٹویٹر پیغام میں لکھا ہے کہ روم حکومت یورپی یونین کے آپریشن ’صوفیہ‘ کو تبدیل کرنے کا مطالبہ کرے گی۔

تونینیلی کے ٹویٹ پیغام کے مطابق،’’ہم قواعد وضوابط کا احترام کرتے ہیں لیکن اب انہیں تبدیل کیا جائے گا۔ مہاجرت محض اٹلی کا مسئلہ نہیں ہو سکتا۔‘‘

رواں برس اب تک اٹلی آنے والے مہاجرین کی تعداد میں گزشتہ سال اسی عرصے کی نسبت اسّی فیصد کمی واقع ہوئی ہے۔ جنوری سے لے کر اب تک ان تارکین وطن کی تعداد سولہ ہزار چھ سو رہی۔

حالیہ برسوں میں یورپ آنے والے مہاجرین کا سب سے زیادہ بوجھ بحیرہ روم پر واقع ممالک اٹلی اور یونان نے اٹھایا ہے۔ اٹلی پہنچنے والے زیادہ تر تارکین وطن شمالی یورپ کی جانب اپنا سفر جاری رکھتے ہیں۔

صائمہ حیدر/ ا ا/ نیوز ایجنسی