ایران مخالف عرب ریاستوں کو امریکا اشتعال دلا رہا ہے، روحانی

ایرانی صدر حسن روحانی نے کہا ہے کہ امریکا ایران میں عدم استحکام چاہتا ہے لیکن اسلامی جمہوریہ ایران کے خلاف ایسی کوئی امریکی کوشش کامیاب نہیں ہو گی۔ حسن روحانی کا یہ بیان ہفتے کے روز ایک فوجی پریڈ پر کیے گئے حملے کے بعد سامنے آیا ہے۔ اِس حملے میں پچیس افراد ہلاک اور ساٹھ دیگر زخمی ہوئے تھے۔ ہلاک شدگان میں سے بارہ کا تعلق پاسداران انقلاب سے تھا۔

 ایرانی صدر نے یہ بات اقوام متحدہ کی جنرل اسمبلی کے اجلاس میں شرکت کے لیے روانگی سے قبل کہی۔ وہ جنرل اسمبلی کے اجلاس سے منگل کو کسی وقت خطاب کریں گے۔ روحانی نے اتوار کے روز اپنے اس بیان میں مزید کہا کہ امریکا خلیجی عرب ریاستوں کو مالی اور عسکری امداد فراہم کر رہا ہے تا کہر وہ ایران کے مخالف مقامی عرب نسلی گروپوں کو فعال کرنے میں کردار ادا کریں۔

روحانی نے خلیجی ریاستوں کی حکومتوں کو امریکا کی کٹھ پتلیاں بھی قرار دیا۔ روحانی کے مطابق امریکا ان عرب ریاستوں کو ایران کے خلاف اشتعال دلانے کا سلسلہ بھی جاری رکھے ہوئے ہے اور اس مقصد کے لیے وہ ضروری امدادی عمل بھی جاری رکھے ہوئے ہے۔

دریں اثناء ایران نے تین یورپی ملکوں کے سفارت کاروں کو اہواز میں فوجی پریڈ پر ہونے والے حملے کے تناظر میں اتوار تئیس ستمبر کو طلب کر کے انہیں اپنی تشویش سے آگاہ کیا۔ جن ملکوں کے سفیروں کو طلب کیا گیا، اُن میں برطانیہ، ہالینڈ اور ڈنمارک شامل ہیں۔ ایرانی حکومت نے الزام عائد کیا ہے کہ حملے کی ذمہ داری قبول کرنے والے گروپ الحوازیہ کے اراکین کی پناہ گاہوں کا تعلق انہی تین یورپی ملکوں سے ہے۔

تہران نے حملے کے پس پردہ غیر ملکی طاقت کے ملوث ہونے کا ذکر بھی کیا ہے تاہم کوئی واضح نام نہیں لیا گیا۔ مبصرین کا خیال ہے کہ ایران کا اشارہ علاقائی حریف سعودی عرب اور اُس کی حامی خلیجی عرب ریاستوں کی طرف ہے۔ اس حملے کے بعد تہران اور ریاض حکومتوں کے درمیان تناؤ اور کشیدگی بڑھنے کا قوی امکان ہے۔

دوسری جانب یورپی سفارتی حلقوں کا کہنا ہے کہ یورپی یونین کسی بھی عسکریت پسند گروپ کو اُس وقت تک بلیک لسٹ نہیں کر سکتی جب تک وہ بظاہر کسی یورپی ملک میں کوئی پرتشدد کارروائی نہ کرے۔ ان حلقوں کے مطابق ایران نے جس گروپ کی جانب اشارہ کیا ہے، وہ ہالینڈ، ڈنمارک اور برطانیہ میں کسی بھی مجرمانہ کارروائی میں ملوث نہیں ہے۔

ع ح ⁄ م م ⁄  روئٹرز