ایران میں انسانی حقوق سے متعلق اقوام متحدہ کی رپورٹ

اقوام متحدہ کی جانب سے ایران میں انسانی حقوق کی صورت حال بارے دو رپورٹوں کا اجرا سوئٹزرلینڈ کے شہر جنیوا میں کیا گیا۔ رپورٹوں کی ریلیز کے موقع پر اقوام متحدہ کے سیکرٹری جنرل بان کی مُون نے ایران میں کم سن نوجوانوں کو بعض الزامات کے تحت موت کی سزا دینے کو فوری طور پر روکنے کا مطالبہ کیا ہے۔ ایران میں انسانی حقوق کے بارے میں رپورٹ مرتب کرنے والے عالمی ادارے کے خصوصی تفتیش کار احمد شہید نے بھی انسانی حقوق کی پیدا شدہ صورت حال پر تشویش کا اظہار کیا۔ احمد شہید کو ایران میں داخل ہونے کی اجازت نہیں دی گئی تھی۔ انہوں نے 169 افراد سے انٹرویو پر مبنی اپنی رپورٹوں کو مرتب کیا ہے۔

بان کی مون نے ان رپورٹوں میں شامل معلومات کی مناسبت سے تشویش ظاہر کرتے ہوئے کہا کہ ایران میں موت کی سزا پر تسلسل سے عمل کیا جا رہا ہے اور ان میں بچے بھی شامل ہیں۔ اس کے علاوہ عالمی ادارے کے سربراہ کا کہنا تھا کہ ایران میں جسمانی اعضاء کاٹنے کے علاوہ کوڑے بھی لگائے جاتے ہیں۔ بان کی مون کا کہنا ہے کہ ایران میں جبری حراست، جانبدارانہ عدالتی کارروائی، ٹارچر، قیدیوں سے ناروا سلوک، ذرائع ابلاغ کے ساتھ منسلک افراد کو ٹارگٹ کر کے ڈرانا دھمکانا، انسانی حقوق کے کارکنوں کو ہراساں کرنے کی حکومتی کوششیں، اقلیتوں کے لیے مذہبی آزادیوں کا فقدان، وکلا اور اپوزیشن کارکنوں کو ناجائز انداز میں خوف زدہ اور ڈرانے کے عمل نے ملک کی داخلی صورت حال کے بارے میں پریشانی میں اضافہ کر دیا ہے۔

اقوام متحدہ کے انسانی حقوق کے لیے مقرر خصوصی تفتیش کار احمد شہید نے بتایا کہ اسلامی جمہوریہ ایران کو متنازعہ جوہری پروگرام کے تناظر میں عالمی برادری کی جانب سے شدید اقتصادی پابندیوں کا سامنا ہے اور اس وجہ سے ایران کے اندر سماجی حالات بہت ابتر ہیں۔ شہید کے مطابق تہران حکومت انسانی حقوق کی منظم خلاف ورزیوں کی باقاعدہ تفتیش کروانے میں مکمل طور پر ناکام دکھائی دیتی ہے۔ مالدیپ کے سابق وزیر خارجہ احمد شہید نے تہران حکومت سے گرفتار انسانی حقوق کے سرگرم کارکنوں کی فوری رہائی کا مطالبہ کیا ہے۔

احمد شہید کا کہنا ہے کہ نمایاں اپوزیشن لیڈروں مہدی کروبی اور میر حسین موسوی کو گھروں پر نظربند رکھا گیا ہے۔ ان کے علاوہ سینکڑوں دوسرے سیاسی کارکن حراست میں ہیں۔ شہید کے مطابق ان افراد کی گرفتاریاں اس بنیاد پر کی گئی ہیں کہ انہوں نے سن 2009 کے صدارتی الیکشن میں ہونے والی مبینہ دھاندلی کے خلاف آزادئ رائے کا حق استعمال کرتے ہوئے آواز بلند کی تھی۔ احمد شہید کے مطابق درجنوں صحافی، بلاگرز اور انسانی حقوق کے کارکن حراست میں لیے جا چکے ہیں۔

اقوامِ متحدہ کی رپورٹ کے مطابق ممتاز ایرانی بلاگر ستار بہشتی کو گزشتہ برس اکتوبر میں حکومت نے گرفتار کیا تھا اور ان کی جیل ہی میں کچھ ہفتوں بعد موت ہو گئی تھی۔ شہید کے مطابق بہشتی کی موت ٹارچر کی وجہ سے ہوئی تھی۔ اسی طرح کئی گرفتار افراد کی وکالت کرنے والے معروف وکیل عبدالفتح سلطانی کو سن 2011 میں گرفتار کیا گیا تھا اور اب وہ 13سال قید کی سزا بھگت رہے ہیں۔ شہید نے یہ بھی بتایا کہ ایران میں شراب نوشی، منشیات فروشی اور زناکاری کے مرتکب افراد کو سنگین سزا یا سزائے موت دی جاتی ہے۔

اقوام متحدہ کی ایران سے متعلق رپورٹوں کو یکسر نظر انداز کرتے ہوئے ایران کے نائب وزیرخارجہ مہدی اخوند زادہ نے جمعرات کے روز اقوام متحدہ کی ہیومن رائٹس کونسل میں بیان دیتے ہوئے کہا کہ ایران میں انسانی حقوق کے اصولوں کی پاسداری پوری شدت سے کی جا رہی ہے۔

(ah/aba(Reuters