ایران: موت کی سزائیں ’ریاستی منظوری سے ہلاکتیں،‘ اقوام متحدہ

ایران میں گزشتہ برس ستمبر میں 22 سالہ ایرانی کرد خاتون مہسا امینی کی ملک کی اخلاقی پولیس کی حراست میں ہلاکت کے بعد شروع ہونے والے مظاہرے کئی مہینوں سے حکومت کے خلاف عوامی احتجاج کی شکل اختیار کر چکے ہیں۔ ان مظاہروں کے دوران اب تک مظاہرین اور ملکی سکیورٹی اہلکاروں سمیت بہت سے افراد مارے جا چکے ہیں جبکہ بےشمار شہریوں کو گرفتار بھی کیا جا چکا ہے۔

’مرگ بر خامنہ ای‘ والی فیس بک پوسٹس کی اشاعت درست ہے، میٹا

گرفتار شدہ مظاہرین میں سے اب تک کم از کم 17 افراد کو ایرانی عدالتیں سزائے موت سنا چکی ہیں۔ ان میں سے چار افراد کو سنائی گئی موت کی سزاؤں پر عمل درآمد بھی کیا جا چکا ہے۔ ایرانی عدلیہ نے ایسے ملزمان کو سزائیں سناتے ہوئے کہا تھا کہ ان پر لگائے گئے 'خدا کے خلاف جنگ‘ کے الزامات ثابت ہو گئے تھے۔

’ریاست کی منظوری سے شہری ہلاکتیں‘

ایران میں حکومت مخالف مظاہرین کو سنائی گئی موت کی سزاؤں کی دنیا کے مختلف ممالک کی طرف سے مذمت کی جا رہی ہے۔ گزشتہ تقریباﹰ چار ماہ سے ملک میں جاری مظاہروں کے دوران جن تقریباﹰ ڈیڑھ درجن شہریوں کو موت کی سزائیں سنائی گئیں، ان میں سے ایک تازہ فیصلے میں تین ملزمان کو ملکی سکیورٹی اہلکاروں کو قتل کرنے کے الزام میں سزائے موت سنائے جانے کی ایرانی عدلیہ نے آج منگل 10 جنوری کے روز تصدیق کر دی۔

احتجاجی مظاہروں کے تناظر میں ایران میں مزید دو افراد کو پھانسی

ایران میں گرفتار مظاہرین کے اہل خانہ کے انٹرویو کرنے پر صحافی گرفتار

اقوام متحدہ کے انسانی حقوق کے ہائی کمشنر فولکر ترک نے ایرانی عدلیہ کے فیصلوں پر شدید تنقید کرتے ہوئے کہا ہے کہ اب تک جن چار مظاہرین کو سنائی گئی موت کی سزاؤں پر عمل درآمد کیا گیا ہے، انہیں دی گئی سزائیں دراصل 'ریاست کی منظوری سے عمل میں آنے والی شہری ہلاکتیں‘ ہیں۔

جنیوا سے موصولہ رپورٹوں میں عالمی ادارے کے انسانی حقوق کے ہائی کمشر کے حوالے سے کہا گیا ہے کہ ایران میں عام شہریوں کو دی جانے والی یہ سزائیں انسانی حقوق کے بین الاقوامی قوانین کے سراسر منافی ہیں۔

فولکر ترک کے الفاظ میں، ''اپنے بنیادی حقوق کو استعمال کرنے والے شہریوں کو سزائیں دینے کے لیے جرائم کی صورت میں قانونی احتساب کے عمل کو بطور ہتھیار استعمال کرنا، جیسا کہ ایران میں عام شہریوں اور شہری تنظیموں کے ارکان کے خلاف کیا جا رہا ہے، بالکل ایسے ہی ہے جیسے ریاست کی اجازت سے انسانوں کو ہلاک کیا جائے۔‘‘

مظاہرین سے یکجہتی کے جرم میں گرفتار ایرانی فلم اسٹار رہا

منصفانہ عدالتی سماعت کے حق کی نفی

ایران میں جن دو مظاہرین کو سنائی گئی سزائے موت پر ہفتہ سات جنوری کو عمل درآمد کیا گیا، ان کے بارے میں اقوام متحدہ اور کئی مغربی ممالک کا دعویٰ ہے کہ ان کے خلاف عدالتی کارروائی میں کئی طرح کے جھول تھے اور انہیں اپنے خلاف مقدمات کی منصفانہ اور شفاف سماعت کا حق بھی حاصل نہیں تھا۔

ایران میں مظاہرے، اقوام متحدہ کا فیکٹ فائنڈنگ مشن

فولکر ترک نے جنیوا میں جاری کردہ ایک بیان میں کہا کہ جن ایرانی باشندوں کو موت کی سزائیں دی گئیں، انہیں نہ تو ان کی مرضی کے وکیل مہیا کیے گئے اور نہ ہی اپنے خلاف عدالتی فیصلوں کے بعد بامعنی حد تک اپیل دائر کرنے کا حق دیا گیا۔

انہوں نے یہ الزام بھی لگایا کہ سزائیں سنائے جانے سے پہلے ایسے ملزمان کو تشدد کے ذریعے اعتراف جرم پر مجبور کیا گیا تھا۔

ایران میں جب سے ملکی عدلیہ نے حکومت مخالف مظاہرین کو موت کی سزائیں سنانے اور پھر ان سزاؤں پر عمل درآمد کا سلسلہ شروع کیا ہے، اس کے بعد سے کئی ماہ سے جاری حکومت مخالف عوامی مظاہرے اب کچھ کم ہو گئے ہیں۔

م م / ا ب ا (روئٹرز، اے ایف پی)