ایران میں فٹبالر کی فیملی کو بیرون ملک جانے سے روک دیا گیا

ایران کے معروف فٹبال کھلاڑی علی دائی کا کہنا ہے کہ 26 دسمبر پیر کے روز ان کی اہلیہ اور بیٹی کو اس وقت بیرون ملک سفر کرنے سے روک دیا گیا، جب وہ ایک طیارے میں سوار ہو کر دبئی جا رہے تھے، تاہم بغیر اعلان کیے ہی پرواز کو ایران کی جانب واپس موڑ دیا گیا۔

ایران میں مظاہرے، اقوام متحدہ کا فیکٹ فائنڈنگ مشن

 علی دائی تہران حکومت کے خلاف گزشتہ کئی ماہ سے جاری مظاہروں کی کھل کر حمایت کرتے رہے ہیں۔

ایرانی ریپر کے خلاف سزائے موت کے مقدمے کی دوبارہ سماعت

ہمیں اب تک اس بارے میں کیا معلوم ہے؟

علی دائی کے مطابق ان کی اہلیہ اور بیٹی ایرانی دارالحکومت تہران سے روانہ ہوئے تھے،  تاہم ان کی پرواز کو غیر اعلانیہ طور پر خلیج فارس کے جزیرے کیش پر پر روک لیا گیا، جہاں حکام نے ان سے پوچھ گچھ کی۔

ایران میں 26 مظاہرین کو پھانسی کا سامنا ہے، ایمنسٹی

فٹبال کھلاڑی نے کہا کہ ان کی بیٹی کو رہا کر دیا گیا ہے، تاہم وہ دبئی جانے والی پرواز میں دوبارہ سوار ہونے سے قاصر تھیں۔ دائی کا کہنا تھا کہ ان کے خاندان نے متحدہ عرب امارات کا سفر کرنے کے بعد اگلے ہفتے ہی واپس آنے کا منصوبہ بنایا تھا۔

کیا ایران ’حجاب قانون‘ میں تبدیلی کرنے جا رہا ہے؟

ایران کی نیم سرکاری نیوز ایجنسی تسنیم، جسے ایرانی انقلابی فورسز سے قریب تر سمجھا جاتا ہے، کا کہنا کہ علی دائی کی اہلیہ پر احتجاج کی حمایت کرنے کی وجہ سے اس ماہ کے اوائل میں ہی سفری پابندیاں عائد کی گئی تھی۔

سرکاری خبر رساں ادارے ارنا نے عدلیہ کا حوالہ دیتے ہوئے کہا کہ چونکہ دائی کا تعلق حکومت مخالف گروہوں کے ساتھ ہے اس لیے ان کی اہلیہ نے، ''ملک چھوڑنے سے پہلے متعلقہ اداروں کو اپنے فیصلے سے آگاہ کرنے کا عہد کیا تھا۔''

حکومت مخالف موقف کی وجہ سے عتاب کا شکار

علی دائی ایران کی ان متعدد مشہور و معروف ایرانی شخصیات میں سے ایک ہیں، جنہوں ستمبر میں 22 سالہ خاتون مہسا امینی کی موت کے بعد شروع ہونے والے مظاہروں کی کھل کر حمایت کی ہے۔

 27 ستمبر کو انہوں نے سوشل میڈیا کا استعمال کرتے ہوئے حکومت سے مطالبہ کیا تھا کہ وہ ''جبر، تشدد اور گرفتاریوں کے بجائے ایرانی عوام کے مسائل کو حل کرنے کی کوشش کرے۔''

فٹبالر کے سوشل میڈیا پر ان ریمارکس کے بعد ہی حکام نے ان کے ساتھ سختی کا معاملہ شروع کر دیا۔ اکتوبر میں بیرون ملک سے واپسی کے بعد پولیس نے دائی کا پاسپورٹ ضبط کر لیا تھا، تاہم کچھ دن بعد اسے واپس کر دیا۔

رواں ماہ دسمبر میں تہران کے فیشن ایبل علاقے میں ان کی زیورات کی معروف دکان اور ریستوراں کو سیل کر دیا گیا تھا۔ مقامی میڈیا کی رپورٹوں کے مطابق، ''سائبر اسپیس میں انقلاب مخالف گروپوں کے ساتھ تعاون'' کرنے کے لیے ان کی دکانوں کو بند کرنے کا حکم دیا گیا ہے۔

ص ز/ ج ا (اے ایف پی، اے پی)