ایران کی روس کو بلیسٹک میزائلوں کی فراہمی، رپورٹس

صحافیوں کو ارسال کردہ ایک ای میل میں یوکرینی وزارت خارجہ نے کہا ہے کہ تہران اور ماسکو کے درمیان عسکری تعاون میں مزید وسعت یوکرین، یورپ اور مشرق وسطیٰ کے لیے خطرہ ہے۔ اس بیان میں بین الاقوامی برادری سے کہا گیا ہے کہوہ ایران اور روس پر دباؤ بڑھائے۔

امریکی نشریاتی ادارے سی این این اور اخبار وال اسٹریٹ جرنل نے جمعے کو ذرائع کی شناخت ظاہر کیے بغیر بتایا تھا کہایراننے روس کو مختصر فاصلے تک مار والے میزائل فراہم کیے ہیں۔

خبر رساں ادارے روئٹرز نے اگست میں ایک رپورٹ میں کہا تھا کہ روس کو ایران کی جانب سے مختصر فاصلے پر مار کی صلاحیت والے 'فتح 360‘‘ نامی میزائل سینکڑوں کی تعداد میں بھیجے جانے والے ہیں۔ جب کہ درجنوں روسی عسکری اہلکاروں کو ایران میں تربیت دی جا رہی ہے کہ وہ سیٹیلائٹ سے گائیڈ کیے جانے والے ان ہتھیاروں کو چلا سکیں۔ کہا جا رہا تھا کہ یہ ہتھیار بالآخر یوکرینی جنگ میں استعمال ہوں گے۔

جمعے کو امریکہ نے بھی ان ایرانی میزائلوں کی روس منتقلی پر تشویش ظاہر کی تھی۔ وائٹ ہاؤس کی قومی سلامتی کونسل کے ترجمان سین ساویٹ نے کہا، ''یوکرین کے خلاف روسی جارحیت کے دوران ایرانی بلیسٹک میزائلوں کی روس کو کسی بھی طرح کی منتقلی سفارتی کشیدگی میں اضافے کا باعث بنے گی۔‘‘

دوسری جانب اقوام متحدہ میں ایرانی مشن نے کہا ہے کہ یوکرینی تنازعے پر ایرانی موقف میں کوئی تبدیلی نہیں آئی ہے، ''ایران اس تنازعے میں شامل فریقین کو کسی بھی طرح کی عسکری معاونت، جو انسانی جانوں کے ضیاع، انفراسٹرکچر کی تباہی اور فائربندی کی کوششوں کو نقصان کا باعث بنے، غیرانسانی سمجھتا ہے۔‘‘

اس بیان میں مزید کہا گیا ہے، ''اس لیے نہ صرف ایران ایسے اقدامات سے دور رہتا ہے، بلکہ دیگر ممالک سے بھی مطالبہ کرتا ہے کہ وہ اس تنازعے میں شامل فریقین کو ہتھیاروں کی فراہمی سے اجتناب برتیں۔‘‘

ع ت، ا ب ا (روئٹرز، اے ایف پی)