ایرانی ایٹمی پروگرام اور موسادکے سربراہ کا دعوٰی

اسرائیلی خفیہ سروس کے جائزوں سے متعلقہ ابھی حال ہی میں شائع ہونے والی تفصیلات کے مطابق اسرائیلی خفیہ سروس موساد کے ڈائریکٹر مائیر ڈاگن نےگزشتہ ہفتے اپنی ریٹائرمنٹ کے موقع پر ایک بریفنگ دیتے ہوئے کہا ہے کہ امریکہ نے تہران کے ایٹمی پروگرام کو اسلحہ سازی کے قابل بننے سے روکنے کے لیے جو پابندیاں لگا رکھی ہیں، ان پر اسرائیل میں کافی زیادہ اتحاد پایا جاتا ہے۔

امریکہ کی طرح اقوام متحدہ نے بھی ایران کے خلاف پابندیاں عائد کر رکھی ہیں۔ موساد کے ریٹائرڈ ہو جانے والے ڈائریکٹر نے کہا کہ ایرانی ایٹمی پروگرام پر اثرانداز ہونے کے لیے یہ وہ اقدامات ہیں جن کی اسرائیلی وزیراعظم نیتن یاہو بھی حمایت کرتے ہیں۔

اس بریفنگ کی خبر رساں ادارے روئٹیرز کو ملنے والی تفصیلات کے مطابق موساد کے سابق ڈائریکٹر ڈاگن نے کہا ہے کہ اگر ایران کوئی ایٹم بم تیار کر بھی سکا، تو وہ سن 2015 سے پہلے اس قابل نہیں ہو سکے گا۔

ڈاگن نے جون 2009 میں بھی اسرائیلی ارکان پارلیمان کو ایک بریفنگ دیتے ہوئے یہ کہا تھا کہ ایران، اس وقت کے مطابق، 2014 تک اپنا پہلا ایٹم بم تیار کر سکتا ہے۔

ایرانی ایٹمی پروگرام کے بارے میں اسرائیلی وزیر دفاع ایہود باراک نے بھی گزشتہ ہفتے یہ کہا تھا کہ ابھی بھی ایران کے ساتھ تنازعے کے حل کے لیے سفارتکاری کا وقت ہے۔

انھوں نے کہا تھا، ضرورت اس بات کی ہے کہ ایران کے خلاف حالیہ عائد پابندیوں سے بھی بہت سخت پابندیاں عائد کی جائیں کیونکہ تہران کے خلاف ایسی مفلوج کر دینے والی پابندیاں ہی وہ موقع ہو گا کہ ایرانی رہنما اپنے ارادوں پر نئے سرے سے غور کرنے پر مجبور ہو جائیں۔

رپورٹ: عصمت جبیں

ادارت:امتیاز احمد