ایرانی فوجی تنصیبات پر اسرائیلی حملے

اسرائیلی فوج کی جانب سے چار سے پانچ گھنٹوں تک مختلف فوجی تنصیبات کو فضائی حملوں کا نشانہ بنایا گیا ہے۔ اسرائیلی فوج نے انہیں ایرانی حملوں کا جواب اور 'یوم توبہ‘ قرار دیتے ہوئے کہا ہے کہ مشن مکمل کر لیا گیا ہے۔

اسرائیلی فوجی ترجمان ڈینیئل ہگاری نے آج ہفتہ کہا ہے، ''ہم نے ایران میں متعدد اہداف کو نہایت درستی سے نشانہ بنایا ہے۔‘‘

انہوں نے بتایا کہ ان حملوں میں ایرانی میزائل سازی کی تنصیبات، زمین سے فضا میں مار کرنے والے میزائل نظام اور فضائی دفاعی نظام کو نشانہ بنایا گیا۔ ہگاری کا کہنا تھا کہ اسرائیل کو اب ایران پر حملوںکے لیے زیادہ ''فضائی آزادی‘‘ دستیاب ہے۔ انہوں نے بتایا کہ اہداف کی فہرست  مقرر کردہ مقامات پر منتخب کی گئی تھی۔

 انہوں نے کہا کہ اگر ضروری ہو جاتا تو فہرست میں شامل مزید اہداف پر بھی حملہ کیا جا سکتا تھا۔

میڈیا رپورٹوں کے مطابق اسرائیل نے ایران میں 20 مقامات پر بمباری کی ہے۔ دوسری جانب ایرانی میڈیا  میں نہایت محدود نقصان کا بتایا گیا ہے۔

دریں اثنا امریکہ نے اسرائیل سے اپیل کی ہے کہ وہ ایرانی جوہری تنصیبات اور آئل فیلڈز پر حملے نہ کرے۔ ایرانی میڈیا کے مطابق ملک میں مختلف فوجی تنصیبات کو محدود پیمانے پر نقصان ہوا ہے، جب کہ ان حملوں میں کسی جانی نقصان کی اطلاعات سامنے نہیں آئی ہیں۔

یہ بات اہم ہے کہ ایرانی فضائی حدود ان حملوں کے وقت فوری طور پر بند نہیں کی گئی تھی تاہم حملوں کے بعد اسے بند کر دیا گیا جب کہ اسرائیل کی جانب سے آپریشن کی تکمیل کے اعلان کے بعد فضائی حدود دوبارہ کھول دی گئی۔

ایرانی میڈیا رپورٹوں میں بتایا گیا ہے کہدارالحکومت تہران اور نواحمیں کئی دھماکے ہوئے ہیں، جب کہ تہران کے مرکز میں بھی دھماکوں اور طیارہ شکن توپوں کی فائرنگ کی آوازیں سنی گئیں۔

واضح رہے کہ اسرائیل کی جانب سے ایران میں یہ حملے یکم اکتوبر کو اسرائیل پر داغے گئے دو سو  ایرانی میزائلوں کی جوابی کارروائی  قرار دی جا رہی ہے۔

اسرائیلی بیان میں کہا گیا ہے کہ یہ حملےایرانی حکومت اور اس کی پراکسی قوتوں کی جانب سے اسرائیل پر مسلسل حملوں کا جواب ہیں۔ یہ بات اہم ہے کہ گزشتہ برس سات اکتوبر کو اسرائیل پر فلسطینی عسکری تنظیم حماس کے دہشت گردانہ حملے کے نتیجے میں بارہ سو اسرائیلی شہریوں کی ہلاکت اور قریب ڈھائی سو کو یرغمال بنا لیے جانے کے بعد سے اسرائیل غزہ میں زمینی اور فضائی کارروائیاں جاری رکھے ہوئے ہے، جب کہ اس دوران خطے میں ایرانی حمایت یافتہ قوتیں حماس کے ساتھ اظہارِیکجہتی کرتے ہوئے اسرائیل کے خلاف کارروائیوں میں ملوث رہی ہیں۔

ع ت، ا ا، ش ر (ڈی پی اے)