بن لادن کی ہلاکت پر ہالی وڈ فلم کی منظوری

القاعدہ کے سربراہ اور دنیا کے سب سے مطلوب دہشت گرد اسامہ بن لادن کی ہلاکت کے موضوع پر فلم کیتھرن بگیلو کی ہدایت میں بنے گی۔ کیتھرن اس سے قبل سن دو ہزار دس میں ’دا ہرٹ لاکر‘ نامی فلم بنا چکی ہیں جس پر انہیں آسکر انعام بھی ملا تھا۔ یہ فلم عراق کی جنگ کے موضوع پر تھی۔

کیتھرن اور مارک بول القاعدہ کے سربراہ کی ہلاکت سے متعلق اسکرپٹ پر بن لادن کی موت سے قبل ہی کام کرنا شروع کر چکے تھے۔

بن لادن کو دو مئی کو پاکستانی شہر ایبٹ آباد میں امریکی افواج نے غیر معمولی آپریشن کر کے ہلاک کیا تھا۔

سونی پکچرز انرٹینمنٹ کی ایمی پاسکل کا کہنا ہے کہ بگیلو اور بول سن دو ہزار آٹھ سے اس اسکرپٹ پر کام کر رہے ہیں، اور اب وہ بن لادن کی موت کے حوالے سے سامنے آنے والے نئے حقائق کو بھی استعمال کریں گے۔ پاسکل کے مطابق بن لادن کی ہلاکت کے بعد یہ فلم اور بھی اہمیت اختیار کر گئی ہے۔

کیتھرن بگیلو کو سن دو ہزار دس میں آسکر ایوارڈز جیت کر آسکرز جیتنے والی پہلی خاتون ہدایت کار بننے کا اعزاز حاصل ہوا تھا۔ ان کی اس نئی فلم سے فلم بینوں کو بہت توقعات ہیں۔

واضح رہے کہ بھارت میں اسامہ بن لادن پر حال ہی میں ایک مزاحیہ فلم بنائی گئی تھی جس کا نام ’تیرے بن لادن’ تھا۔ اس فلم میں پاکستانی گلوکار اور اداکار علی ظفر نے کام کیا تھا۔ مذکورہ فلم پاکستان میں بین کر دی گئی تھی۔

رپورٹ: شامل شمس⁄ خبر رساں ادارے

ادارت: عدنان اسحاق