بنگلہ دیش میں اقتصادی ترقی کی ریکارڈ شرح

بنگلہ دیش کے مرکزی بینک کا کہنا ہے کہ ملک میں اقتصادی ترقی میں اضافے کا سلسلہ رواں سال جولائی میں شروع ہونے والے مالی سال کی ابتدا سے ہوا۔ ماہ اکتوبر تک یعنی صرف چار ماہ کے عرصے میں بڑے پیمانے پر کپڑوں کی تیاری کے آرڈرز ملنے کی وجہ سے ملکی برآمدات میں 37 فیصد اضافہ ریکارڈ کیا گیا۔

دوسری جانب ملک میں مقامی سطح پر طلب میں اضافے کے سبب درآمدات میں بھی 37 فیصد اضافہ دیکھنے میں آیا۔ مزید یہ کہ ملک کی صنعتی مشینری میں بھی 36 فیصد اضافہ ہوا، جو ملک میں صنعتکاری کے شعبے میں بہت بڑے ہیمانے پر ہونے والی وسعت کی جانب ایک مثبت اشارہ ہے۔

گزشتہ مالی سال کے دوران عالمی اقتصادی بحران کے سبب بنگلہ دیش کی مجموعی قومی پیداوار گزشتہ سات سال کی کم ترین سطح 5.8 فیصد پر تھی تاہم رواں سال اس سطح میں متاثر کن اضافہ دیکھا گیا۔ مرکزی بینک کے مطابق اگر ترقی کی یہ شرح برقرار رہی تو ملکی جی ڈی پی رواں مالی سال میں 6.7 فیصد جبکہ 2012ء کی درمیانی میعاد میں سات فیصد تک پہنچ سکتی ہے، جو بنگلہ دیش کی اقتصادی ترقی کے لئے ایک ریکارڈ ہو گا۔

اس سے قبل سن 2006 میں بنگلہ دیش نے ملکی تاریخ میں سب سے زیادہ معاشی ترقی کی تھی، جب اس کی سالانہ مجموعی قومی پیداوار 6.6 فیصد تک پہنچ گئی تھی۔

برآمد کنندگان کا کہنا ہے کہ اس سال بنگلہ دیش کی معاشی ترقی کی سب سے بڑی وجہ مغربی ممالک اور شمالی امریکہ میں سستے کپڑے فراہم کرنے والے بڑے برانڈز Gap، Wal-Mart اور H&M جیسے بڑے ریٹیلرز کی جانب سے ملنے والے کپڑوں کے بڑے آرڈرز تھے۔

واضح رہےکہ بنگلہ دیش کو برآمدات کی مد میں ہونے والی مجموعی آمدنی کا 80 فیصد حصہ مغربی برانڈز کے لئے ریڈی میڈ کپڑوں کی برآمدات سے حاصل ہوتا ہے جبکہ ملک کی 40 فیصد افرادی قوت صرف اسی صنعت سے وابستہ ہے۔

رپورٹ: عنبرین فاطمہ

ادارت: امجد علی