بنگلہ دیش میں سیلاب: آٹھ ہلاک، 20 لاکھ سے زائد متاثر

17 کروڑ کی آبادی والے اس جنوب ایشیائی ملک میں سینکڑوں دریاؤں کا ایک جال موجود ہے اور حالیہ دہائیوں میں وہاں آنے والے سیلاب کے واقعات میں اضافہ ہوا ہے۔

ماحولیاتی تبدیلیوں کے سبب بارشوں کی شدت میں اضافہ ہوا ہے اور ساتھ ہی ہمالیہ کے پہاڑی سلسلے میں موجود گلیشیئرز کے پگھلنے کی رفتار میں بھی اضافہ ہوا ہے۔

بنگلہ دیش: سمندری طوفان سترنگ کی تباہ کاریاں، نو افراد ہلاک

بنگلہ دیش میں سیلابوں سے 25 افراد ہلاک، چالیس لاکھ متاثر

خبر رساں ادارے اے ایف پی نے ملک کے ایک شمالی شہر شاہجدور کے پولیس سربراہ سبوج رانا کے حوالے سے بتایا ہے کہ دو نوجوانوں کی موت دریا میں کشتی کے ڈوب جانے کے سبب ہوئی۔

کوریگرام کے پولیس سربراہ بشوا دیب رائے کے مطابق تین دیگر افراد کرنٹ لگنے کے دو واقعات میں ہلاک ہوئے۔ ان واقعات میں متاثرین کی کشتیاں سیلابی پانی میں گرنے والی بجلی کی تاروں سے الجھ گئی تھیں۔

بنگلہ دیشی حکام نے قبل ازیں رواں ہفتے کے دوران بتایا تھا کہ تین دیگر افراد سیلاب سے متعلق واقعات میں ہلاک ہو گئے تھے۔

حکومت کے مطابق اس نے سیلابی پانی کے سبب بے گھر ہونے والے شہریوں کے لیے سینکڑوں پناہ گاہیں کھول دی ہیں جبکہ ملک کے شمالی حصے میں سیلاب سے شدید متاثر ہونے والے علاقوں میں خوراک اور دیگر امدادی سامان روانہ کر دیا گیا ہے۔

بنگلہ دیش کی ہنگامی حالات سے نمٹنے والی وزارت کے سیکرٹری قمر الحسن کے مطابق، ''دو ملین سے زائد افراد  سیلاب سے متاثر ہوئے ہیں۔ ملک کے کُل 64 میں سے 17 اضلاع اس سیلاب سے متاثر ہیں۔‘‘

قمر الحسن نے خدشہ ظاہر کیا کہ ملک کے شمالی حصے میں صورتحال مزید خراب ہو سکتی ہے کیونکہ براہماپترا نامی دریا میں کئی مقامات پر پانی کی سطح خطرناک حد تک بلند ہو چُکی ہے۔ 

ا ب ا/ک م (اے ایف پی)