بھارتی ٹینک دریا میں غرقاب، 5 فوجی اہلکار ہلاک

ہفتے کی صبح ایک بھارتی عسکری ٹینک چین کی سرحد کے قریب لداخ میں دریا پار کرتے ہوئے غرقاب ہو گیا اور اس میں موجود پانچ فوجی اہلکار ہلاک ہو گئے۔

اس حوالے سے بھارتی فوج کے کمانڈ سینٹر کی جانب سے جاری کردہ بیان میں کہا گیا ہے کہ یہ حادثہ ایک فوجی ٹریننگ کے دوران دریائے شیوک میں پانی کی سطح میں اچانک اضافے کے باعث پیش آیا۔ اس بیان میں مزید کہا گیا ہے کہ یہ واقعہ ساسر برانگسا میں چین اور بھارت کے درمیان موجود لائن آف ایکچوئل کنٹرول کے قریب پیش آیا۔

بھارت کے وزیر دفاع راجناتھ سنگھ نے اس حادثے پر افسوس کا اظہار کیا ہے۔ سوشل میڈیا پلیٹ فارم ایکس پر ایک بیان میں انہوں نے کہا کہ یہ ایک "افسوس ناک حادثہ" ہے اور اس میں ہلاک ہونے والے سپاہیوں کی خدمات کو کبھی بھلایا نہیں جائے گا۔ ان کا مزید کہنا تھا کہ اس دکھ کی گھڑی میں قوم ان سپاہیوں کے لواحقین کے ساتھ کھڑی ہے۔

لداخ میں چینی اور بھارتی افواج کے مابين مئی 2020ء میں جھڑپیں ہوئی تھیں، جن میں 20 بھارتی اور چار چینی سپاہی ہلاک ہو گئے تھے۔ تب ہی سے اس سرحد پر کشیدگی میں اضافہ دیکھا گیا ہے اور ان دونوں ممالک نے فوجی اہلکاروں کی ایک بڑی تعداد وہاں تعینات کی ہوئی ہے۔

(اے پی) م ا ⁄ ع س