بی جے پی کی ممکنہ فتح اور آزادی اظہار کے حامیوں کے خدشات

تب ٹیلی فون پر ایک نامعلوم آواز میں انہیں دھمکی دی جاتی تھی، ’اگر تم نے یہ کتاب چھاپی تو ہم تمہیں جان سے مار دیں گے‘۔ اس کی وجہ اس وقت 74 سالہ دیوندر نارائن جھا کی وہ کتاب تھی، جس کا عنوان تھا، ’مقدس گائے، کھانے کی بھارتی روایات میں گوشت‘۔

دہلی یونیورسٹی کے یہ سابق پروفیسر اب تک ایک درجن کے قریب کتابیں لکھ چکے ہیں۔ 2001ء میں انہوں نے اس بارے میں بحث کے ساتھ ہندو مذہبی انتہا پسندوں کو شدید ناراض کر دیا تھا کہ اس بارے میں تاریخی ثبوت موجود ہیں کہ زمانہء قدیم میں ہندو گائے کا گوشت کھایا کرتے تھے۔ اس بحث کے بعد ناراض ہندو سیاسی کارکنوں نے ان کے گھر پر حملہ کر دیا تھا اور اگلے تین سال پروفیسر جھا کو پولیس کی حفاظت میں گزارنا پڑے تھے۔

انہیں اس دوران اپنی ممکنہ گرفتاری کے خلاف بھی مسلسل کوششیں کرنا پڑی تھیں۔ تب بی جے پی کے ایک سابق رکن پارلیمان کی طویل عرصے تک یہ کوشش رہی کہ پروفیسر جھا کو یہ دعویٰ کرنے پر گرفتار کیا جانا چاہیے کہ ہندو جس جانور کو مقدس جانتے ہیں، کبھی وہ اسی کا گوشت کھایا کرتے تھے۔

بھارت کو زیادہ تر ایک ترقی پسند اور سیکولر جمہوریت سمجھا جاتا ہے۔ پروفیسر جھا کی گائے کے گوشت کے بارے میں کتاب شائع تو ہو گئی تھی لیکن اس پر کچھ عرصے کے لیے پابندی بھی لگا دی گئی تھی۔ ایسا ایک ہندو مذہبی گروپ کی طرف سے دائر کیے جانے والے مقدمے کے نتیجے میں ہوا تھا، جو ریاست آندھرا پردیش میں دائر کیا گیا تھا۔

بھارت میں سات اپریل سے قومی پارلیمانی انتخابات کا آغاز ہونے والا ہے اور وہ پانچ ہفتے تک جاری رہنے کے بعد مئی کے وسط میں مکمل ہوں گے۔ رائے عامہ کے جائزوں کے مطابق اس الیکشن میں ممکنہ طور پر بھارتیہ جنتا پارٹی جیت جائے گی جو ملکی سطح پر دس سال سے اپوزیشن میں ہے۔

ہندو قوم پسند جماعت بی جے پی کی انتخابی کامیابی کے کافی زیادہ امکانات کی وجہ سے بھارت میں کئی سیاسی اور سماجی حلقوں کو خدشہ ہے کہ آئندہ وہاں ثقافتی عدم برداشت کا ایک نیا دور دیکھنے میں آ سکتا ہے۔ خاص طور پر پارٹی کے سخت گیر نظریات کے حامل رہنما نریندر مودی کے بھارت کا نیا وزیر اعظم بن جانے کی صورت میں۔

بھارتی مؤرخ دیوندر نارائن جھا نے دہلی کے مشرقی حصے میں اپنے گھر پر نیوز ایجنسی اے ایف پی کے ساتھ ایک انٹرویو میں کہا، ’’اگر بی جے پی، خاص کر نریندر مودی اقتدار میں آ گئے، تو یہ ممکن ہے کہ اسکالرز کو ہراساں کیا جائے اور ملکی قوانین کو ان کے خلاف استعمال کرنے کی کوشش کی جائے۔‘‘

ان حالات میں بھارت میں آزادیء رائے اور آزادیء اظہار کے حامی کافی تشویش میں مبتلا ہیں۔ بھارت دنیا کی سب سے بڑی جمہوریت ہے۔ وہاں کا پریس بھی بہت فعال ہے۔ وہاں کا دانشور طبقہ اپنے غیر جانبدارانہ سوچ کا حامل ہونے پر فخر کرتا ہے اور آزادیء اظہار کے حق کا ڈٹ کر مقابلہ کرتا ہے۔ لیکن ایک بھارتی پبلشر کے مطابق ملک میں ابھی سے ’خود پر پابندیاں لگانے‘ یا ‘سیلف سنسرشپ‘ کے آثار نظر آنے لگے ہیں۔ اپنے اوپر یہ سنسرشپ وہ صحافی اور مصنفین لگا رہے ہیں جو بی جے پی کے وزارت عظمیٰ کے امیدوار نریندر مودی کے بارے میں لکھ رہے ہیں۔

نئی دہلی میں عورتوں کے حقوق کے لیے جدوجہد کرنے والے ایک پبلشنگ ہاؤس Zuban books ’زبان بُکس‘ سے منسلک ارواشی بوٹالیا کے مطابق مودی پر ماضی میں جو کچھ تنقیدی انداز میں لکھا گیا تھا، اس کی شدت بھی تبدیلیوں کے ساتھ کم کر دی گئی ہے۔ بُوٹالیا کے بقول، ’’اگر بھارتیہ جنتا پارٹی اقتدار میں آ گئی تو آزادیء اظہار پر پابندیاں بھی دیکھنے میں آئیں گی۔‘‘