تمام مسلم اقوام فلسطین کے ساتھ کھڑی ہو جائیں، ترکی

استنبول میں مسلمان ممالک کے اپنے ہم منصبوں سے خطاب کرتے ہوئے ترک وزیر خارجہ مولود چاؤش اولو نے کہا کہ امریکا کے ’’غیر قانونی‘‘ فیصلے سے اسرائیل کی ہمت افزائی ہوئی کہ وہ ’’معصوم فلسطینیوں کا وحشیانہ قتل کرے‘‘۔

ترکی اس وقت 57 اسلامی ممالک کی تنظیم ’’آرگنائزیشن آف اسلامک کوآپریشن‘‘ (OIC) کا صدر ملک ہے۔ ترکی نے رواں ہفتے اسرائیل کی طرف سے غزہ سرحد پر 60 فلسطینیوں کو فائرنگ کر کے ہلاک کیے جانے کے بعد اس تنظیم کا ایک ایمرجنسی اجلاس بلایا تھا۔

اسلامی تعاون کی اس تنظیم کے وزرائے خارجہ کے استنبول میں جاری اجلاس سے خطاب کرتے ہوئے چاؤش اولو کا کہنا تھا، ’’ہمیں دیگر ممالک کو امریکی مثال کی پیروی کرنے سے روکنا ہو گا‘‘۔

خبر رساں ادارے ایسوسی ایٹڈ پریس کے مطابق ترک وزیر خارجہ کا مزید کہنا تھا کہ او آئی سی کی طرف سے سربراہی اجلاس کے اعلامیے میں فلسطین کے مسئلے کو اجاگر کیا جائے گا اور ’’متفقہ طور پر آواز بلند کی جائے گی کہ ہم مقدس شہر کی تاریخی حیثیت میں رد و بدل کی اجازت نہیں دیں گے۔‘‘

امید کی جا رہی ہے کہ آج جمعہ کی شب او آئی سی کے سربراہی اجلاس سے ترک صدر رجب طیب ایردوآن، اردن کے شاہ عبداللہ ثانی اور فلسطینی وزیر اعظم رامی حمداللہ خطاب کریں گے۔ ایرانی صدر حسن روحانی بھی اس اجلاس میں شریک ہوں گے۔

ا ب ا / ع ق (ایسوسی ایٹڈ)