جرمن شہريوں کی سوچ و نظريات: حقيقت کيا، افسانہ کيا؟

کچھ لوگوں کا دعویٰ ہے کہ ویسٹ فیلیا کے لوگ ضدی، شمالی جرمنی کے شہری کم گو اور باویریا میں رہنے والے فطرتاً سخت مزاج ہوتے ہیں۔ جرمنی کے مختلف علاقوں میں بسنے والوں کی مختلف خصوصیات بیان کی جاتی ہیں۔

ڈاکٹر ڈاگمار ہینزل لوگوں کی خصوصیات سے متعلق سوالات کے جوابات دینے میں ماہر ہیں۔ وہ جرمن شہر بون میں عوامی حکایات اور علاقائی تاریخ کے حوالے سے قائم ایک ادارے سے منسلک ہیں۔

ایک سوال کے جواب میں انہوں نے بتایا کہ جرمنی کے مختلف خطوں اور شہروں میں بسنے والوں کی مختلف خصوصیات بیان کی جاتی ہیں۔ ان کے بقول ’اسٹیریو ٹائپس‘ ہمیشہ عام تاثر کی عکاسی کرتے ہيں۔ مثال کے طور پر آپ کچھ واقعات یا شاید ایک واقعے کی بنا پر تمام لوگوں کو ایک جیسا سمجھنے لگتے ہیں۔ یہ صحیح نہیں ہے۔ مثال کے طور پر ماضی میں سیاسی طور پر دائیں بازو کے نظریات رکھنے کی وجہ سے آپ ریاست سیکنسی کے تمام لوگوں کو دائیں بازو کا شدت پسند قرار نہیں دے سکتے۔

سوال: آج کل جرمنی میں غیر ملکیوں کی آمد پر شدید بحث جاری ہے۔ باہر سے آنے والا کس طرح معاشرے میں ضم ہو سکتا ہے؟

ڈاکٹر ڈاگمار ہینزل: میرے خیال میں کسی بھی تارک وطن کو سب سے پہلے جرمن زبان سیکھنی چاہیے۔ یہی وہ کنجی ہے، جس کے ذریعے زندگی کے تمام شعبوں کے دروازے کسی بھی غیر ملکی کے لیے کھلتے ہیں۔ ہم آہنگی اسی وقت اچھے طریقے سے پیدا ہوتی ہے، جب غیر ملکی اور مقامی شہری ایک دوسرے سے بات کرتے ہیں اور اختلافات پر بحث کی جاتی ہے۔

وہ مزید کہتی ہیں کہ ان کے خیال میں جرمنی میں جمہوریت کی اصل اقدار  اور ماضی کو نہ بھلانے کی روایت قائم ہو چکی ہے۔ یہی وہ چیز ہے، جو جرمنی کو دیگر یورپی ممالک سے کچھ حد تک ممتاز بناتی ہے۔