جرمنی: مہاجرین اور تارکین وطن کو کنڈومز مفت ملیں گے

جرمن ایڈز سروس آرگنائزیشن کی جانب سے حال ہی میں اٹھائے جانے والے اس اقدام کے بعد سے مہاجرین کے استقبالیہ مراکز اور تارکین وطن کے لیے کام کرنے والی تنظیمیں آگے تقسیم کرنے کے لیے کنڈومز بلا قیمت حاصل کر سکتی ہیں۔

جرمن ایڈز سروس مجموعی طور پر ساڑھے تین لاکھ کنڈومز فراہم کرر ہی ہے، جس کا مقصد مانع حمل اور جنسی عمل کت ذریعے پھیلنے والی بیماریوں پر قابو پانا ہے۔ یہ تنظیم ایچ آئی وی کی تشخیص کے لیے بھی پناہ گزین افراد کو آمادہ کرنا چاہتی ہے۔

اس حوالے سے تمام معلومات ہیلتھ سروس کی ویب سائٹ ’یؤر ہیلتھ ٹپس‘‘ پر پانچ زبانوں میں فراہم کی گئی ہیں۔ ان زبانوں میں انگریزی، فرانسیسی، روسی، عربی اور جرمن زبان شامل ہیں۔

ویب سائٹ پر جنسی تعلقات کے نتیجے میں منتقل ہونے والی ایچ آئی وی جیسی بیماریوں کے حوالے سے اہم معلومات دی گئی ہیں۔ یہ بھی بتایا گیا ہے کہ اس سے بچاؤ کیسے ممکن ہے۔

ایڈز سروس کے چیئر ممبر بؤرن بیک کے مطابق،’’ ہم یہ پیغام دینا چاہتے ہیں کہ اگر آپ ایچ آئی وی پازیٹیو ہیں تو ہم آپ کی مدد کر سکتے ہیں۔ مدد کے لیے آپ کو زیادہ تردّد نہیں کرنا پڑے گا۔ ہم آپ کے ساتھ ہیں۔‘‘ بیک کا کہنا ہے کہ بہت سے افراد اس لیے بھی ایڈز کے ٹیسٹ کے لیے آمادہ نہیں ہوتےکیونکہ انہیں تنہائی اور لوگوں کی جانب سے نفرت اور دشمنی کے سامنے کا خوف ہوتا ہے۔

جرمن ایڈز سروس کا کہنا ہے کہ کنڈومز کی فراہمی کی مہم خاص طور پر ایسے تارکین وطن کے لیے تشکیل دی گئی ہے جو ایسے ممالک سے جرمنی آئے ہیں جہاں اس بیماری کا پھیلاؤ بہت زیادہ ہے۔ متاثرہ علاقوں میں سب صحارا افریقہ کے ممالک اور روس شامل ہیں۔ علاوہ ازیں ہم جنس پرست اور ٹرانسجینڈر افراد کو بھی اسی درجہ بندی میں رکھا گیا ہے۔

مہم کا مقصد یہ ہے کہ ایسے مہاجرین جو ایچ آئی وی پازیٹیو ہوں، انہیں جلدی طبی امداد فراہم کی جائے تاکہ اسے آگے پھیلنے سے روکا جا سکے۔ ابتدائی درجے پر ایڈز کی تشخیص ہو جائے تو اس کے علاج میں اچھے نتائج مرتب ہوتے ہیں۔

ص ح / ع ب