لوئر سیکسنی کی پارلیمانی عمارت پر اسلام پسندانہ سیاسی نعرے

ہینوور سے موصولہ رپورٹوں کے مطابق شمالی جرمنی کے اس شہر میں ریاستی پارلیمان کی عمارت پر گرافیٹی کی صورت میں سیاسی نعرے لکھے اور علامات بنائے جانے کا یہ واقعہ جمعہ 13 ستمبر اور ہفتہ 14 ستمبر کی درمیانی رات پیش آیا۔

جرمنی: کرسمس کی تقریبات پر حملوں کا شبہ، نوجوان پولیس تحویل میں

صوبائی پارلیمان کی خاتون سربراہ ہانا نابر نے آج ہفتے کے روز بتایا کہ لوئر سیکسنی کی پارلیمان کی عمارت کو ''انتہا پسندانہ اسلامی سوچ کی حامل ایک دہشت گرد تنظیم کے سیاسی نعروں اور نشانات سے بدنما بنا دیا گیا۔‘‘ حکام نے یہ نہیں بتایا کہ اسلام کے نام پر دہشت گردانہ سوچ رکھنے والی یہ تنظیم کون سی ہے۔

ہانا نابر نے کہا، ''یہ ایک مجرمانہ فعل ہے، جس کی میں سخت ترین الفاظ میں مذمت کرتی ہوں۔‘‘

جرمنی میں چاقو حملہ، ایک شامی شخص کا اعتراف جرم

پولیس کا موقف

ہینوور پولیس کے جاری کردہ ایک بیان کے مطابق جمعے اور ہفتے کی درمیانی شب تین اور چار بجے کے درمیان نامعلوم افراد نے ریاستی پارلیمان کی عمارت پر یہ نعرے اور علامات سرخ رنگ سے پینٹ کیے۔‘‘ یہ گرافیٹی عمارت کے داخلی دروازے کے قریبی ستونوں کے علاوہ اس عمارت کے سامنے والے دیگر حصوں پر بھی بنائی گئی۔

حکام نے بتایا کہ انہوں نے ''صبح سویرے ملنے والے چند شواہد محفوظ کر کے‘‘ چھان بین شروع کر دی ہے۔ پولیس کی طرف سے تفتیش جاری ہے لیکن اس واقعے کی لوئر سیکسنی کی پارلیمان کی طرف سے اپنے طور پر بھی داخلی چھان بین کی جائے گی۔

جرمنی میں داعش کا پہلا حملہ کرنے والی لڑکی کو سزائے قید

اس سلسلے میں پارلیمان کی سربراہ ہانا نابر نے کہا، ''لوئر سیکسنی کی پارلیمان جمہوری بحث کی بھرپور حمایت کرتی ہے، لیکن ہم اپنی ہر ممکن کوشش کرتے ہوئے اس واقعے کے مرتکب افراد کو انصاف کے کٹہرے میں لائے جانے کو بھی یقینی بنائیں گے۔‘‘

پارلیمان کے دروازے عوام کے لیے کھلے

نیوز ایجنسی ڈی پی اے کے مطابق ہینوور شہر میں یہ واقعہ صوبائی پارلیمان کے 'اوپن ڈے‘ سے محض ایک رات قبل پیش آیا۔ پارلیمان کی انتظامیہ کے مطابق 'اوپن ڈے‘ پروگرام میں اس واقعے کے باعث کوئی تبدیلی نہیں کی جائے گی۔

جرمن چانسلرکا چاقو حملے سے متاثرہ زولنگن شہر کا دورہ

آج ہفتہ 14 ستمبر کو ہینوور میں لوئر سیکنسی کی پارلیمان کے دروازے ہر سال منائے جانے والے 'اوپن ڈے‘ کے موقع پر عوام کے لیے کھلے رکھے جائیں گے۔ اس دوران صوبائی قانون ساز ادارے کی کارکردگی میں دلچسپی رکھنے والے عام شہری پارلیمان کا دورہ کر کے خود کو ہر حوالے سے آگاہ کر سکتے ہیں۔

وفاقی چانسلر اولاف شولس کی جماعت سوشل ڈیموکریٹک پارٹی سے تعلق رکھنے والی صوبائی پارلیمانی اسپیکر ہانا نابر کے الفاظ میں، پارلیمانی عمارت کی بے توقیری اور بدنمائی کے اس واقعے کے باعث ''اوپن ڈے پروگرام کسی بھی طرح متاثر نہیں ہو گا اور ایسا ہونا بھی نہیں چاہیے۔‘‘

م م / ا ا (ڈی پی اے، ای پی ڈی)