جرمنی: یورپ کی سب سے بڑی معیشت کو کساد بازاری کا خطرہ

جرمن حکومت کے ماہرین معاشیات کے ایک پینل نے پیر کے روز کہا کہ کورونا وائرس کی وجہ سےعائد کی جانے والی پابندیاں مجموعی قومی پیداوار میں دو اعشاریہ آٹھ فیصد سے لے کر پانچ اعشاریہ چار فیصد تک کمی کی وجہ بنیں گی۔

حکومتی ماہرین اقتصادیات کے پینل 'ایس وی آر‘ کا کہنا ہے کہ فی الحال یہ نہیں بتایا جا سکتا کہ جرمن معیشت کو کس قدر نقصان پہنچے گا۔ ماہرین کے مطابق اس بات کا انحصار اس بات پر ہو گا کہ حکومت کورونا وائرس کے بحران کے پیش نظر عائد کردہ پابندیاں کب تک برقرار رکھتی ہے اور معیشت کی بحالی کس تیزی کے ساتھ ہوتی ہے۔

دنیا کے دیگر معاشی ماہرین کی طرح جرمن ماہرین نے بھی یورپ کی اس سب سے بڑی اور مضبوط معیشت میں بحالی کے حوالے سے مختلف منظرنامے پیش کیے ہیں۔ جرمنی کی معیشت انگریزی کے حرف 'وی‘ یا پھر 'یو‘ کی سی شکل میں بحال ہو سکتی ہے۔ 'وی‘ کی صورت میں جس تیزی سے معیشت نیچے گر رہی ہے، اسی تیزی سے بحال بھی ہو سکتی ہے۔ اگر یہ بحالی 'یو‘ کی شکل اختیار کرتی ہے، تووہ سست رفتار ہو گی۔

جرمنی کی آبادی تقریباﹰ تراسی ملین ہے اور اسے اٹلی، فرانس یا اسپین کی نسبت نرم لاک ڈاؤن کا سامنا ہے۔ لیکن اس کے باجود ملک میں فضائی کمپنی لفتھانزا اور فوکس ویگن جیسے بڑے کارساز ادارے اپنے آپریشن بند کر چکے ہیں۔

ایس وی آر  کی رپورٹ کے مطابق اگر گرمیوں میں صورت حال معمول پر آ گئی، تو بھی مجموعی قومی پیداوار یا جی ڈی پی میں دو اعشاریہ آٹھ فیصد تک کی کمی پیدا ہو جائے گی جبکہ اسی صورت حال میں آئندہ برس بھی تین اعشاریہ سات فیصد کی کمی کا امکان ظاہر کیا جا رہا ہے۔

دوسری جانب اگر کورونا وائرس کا بحران مزید شدت اختیار کر جاتا ہے، تو سن دو ہزار اکیس میں بھی جرمنی کی مجموعی قومی پیداوار میں تقریباﹰ پانچ فیصد تک کی کمی واقع ہو سکتی ہے۔

ایس وی آر کے رکن آخم ٹروئیگر نے برلن حکومت پر زور دیا ہے کہ وہ صحت اور معاشی اقدامات کےحوالے سے یورپ کی دوسری حکومتوں کے ساتھ ہم آہنگی پیدا کرے کیوں کہ جرمنی کی معیشت انتہائی مربوط معیشت ہے۔ دوسرے لفظوں میں جرمن معیشت کی بحالی کا انحصار دیگر یورپی ملکوں کی معیشتوں کی بحالی پر بھی ہو گا۔

آخم ٹروئیگر کا کہنا تھا، ''یہ کسی ایک ملک (جرمنی) کے لیے اچھا نہیں ہے کہ وہ اس بحران سے جلدی اور اچھے طریقے سے باہر نکل آئے جبکہ اس کے ارد گرد یہ بحران موجود رہے۔ اگر ایساہوا تو ہم پیداوار میں اضافہ نہیں کر سکیں گے۔‘‘

اس اقتصادی مشاورتی گروپ نے جرمن حکومت کی طرف سے ایک اعشاریہ ایک ٹریلین یورو کےامدادی پیکج کی بھی تعریف کی ہے، جس کا مقصد کورونا وائرس کے بحران سے متاثرہ کمپنیوں، کاروباری اداروں اور ملازمین کی مدد کرنا ہے۔

اس رپورٹ میں جرمنی کی ڈیجیٹلائزیشن پالیسی کو تنقید کا نشانہ بنایا گیا ہے۔ ماہرین کے مطابق روزمرہ زندگی میں ڈیجیٹل طریقے سے معاملات نمٹانے کے حوالے سےجرمنی کئی دیگر ممالک کی نسبت ابھی بہت پیچھے ہے۔

ا ا / ک م (ڈی پی اے، اے ایف پی)