جی ٹونٹی اجلاس کا آغاز

آج جمعرات سے روسی شہر سینٹ پیٹرسبرگ میں دنیا کی بڑی صنعتی طاقتوں اور ترقی کی دہلیز پر کھڑی بیس ریاستوں کے گروپ جی ٹوئنٹی کا سربراہی اجلاس شروع ہو گیا ہے۔ سینٹ پیٹرسبرگ میں قائم مشہور زمانہ کونسٹانٹین پیلس میں ہونے والے اس اجلاس میں شرکت کے لیے جی ٹوئنٹی میں شامل ریاستوں کے سربراہان وہاں پہنچ چکے ہیں۔

امریکی صدر باراک اوباما آج جمعرات کو جی ٹوئنٹی اجلاس میں شرکت کے لیے روس پہنچے۔ اس موقع پر اوباما پوری کوشش کر رہے ہیں کہ میزبان ملک کے صدر ولادیمیر پوٹن کو شام پر ممکنہ لیکن متنازعہ امریکی فوجی حملے کا قائل کر لیا جائے۔ اُدھر جی ٹونٹی گروپ پر اس ضمن میں کوئی حتمی فیصلہ کرنے کے بارے میں بڑھتے ہوئے دباؤ کے تحت اقوام متحدہ نے اپنے خصوصی مندوب لخضر براہیمی کو روس روانہ کر دیا ہے۔ براہیمی سینٹ پیٹرس برگ کے اجلاس میں شام کے بحران کے حل کے لیے امن مذاکرات پر بات کریں گے۔ اقوام متحدہ نے یہ قدم امریکی سینیٹ کی خارجہ امور کی کمیٹی کی طرف سے شام کے خلاف عسکری کارروائی کی اجازت دیے جانے کے بعد اٹھایا ہے۔ گزشتہ روز اس کمیٹی نے شام کے خلاف عسکری کارروائی کو سات کے مقابلے میں دس ووٹوں سے منظور کر لیا تھا۔ معمولی اکثریت سے اس منظوری سے اشارہ ملتا ہے کہ صدر باراک اوباما کو ایوان نمائندگان میں اس کی توثیق کے لیے مشکلات کا سامنا ہو سکتا ہے۔ اس وجہ سے اوباما اس معاملے میں عالمی برادری کی حمایت حاصل کرنے کی پوری کوشش میں ہیں۔

جی ٹونٹی کے اجلاس سے ایک روز قبل روسی صدر ولادیمیر پوٹن نے خبردار کیا تھا کہ اقوامِ متحدہ کی منظوری کے بغیر کوئی بھی کارروائی ’جارحیت‘ ہو گی۔ پوٹن نے امریکا اور شام پر فوجی حملے کی حمایت کرنے والے اُس کے حلیفوں سے ایک بار پھر دمشق حکومت کی طرف سے 21 اگست کو اپنے عوام کے خلاف مبینہ طور پر زہریلی گیس کے استعمال کے بارے میں ٹھوس شواہد پیش کرنے کا مطالبہ کیا تھا۔ اس بارے میں امریکی خفیہ اداروں کا کہنا ہے کہ شامی حکومت کے اس اقدام کے نتیجے میں دمشق کے نواحی علاقے کے قریب 1400 افراد زہریلی گیس کے سبب لقمہ اجل بنے تھے۔

آج سے شروع ہونے والے دو روزہ جی 20 اجلاس سے قبل امریکی صدر باراک اوباما کا ماسکو کا دورہ طے تھا۔ وائٹ ہاؤس کی طرف سے تاہم اسے منسوخ کر دیا گیا۔ اس کی بجائے اوباما گزشتہ روز یعنی چار ستمبر کو اسٹاک ہولم پہنچے، جہاں انہوں نے یورپ کی چند شمالی ریاستوں کے قائدین سے ملاقات کی۔

اسٹاک ہولم میں اوباما نے کہا، " میں نے کوئی سرخ لکیر نہیں بنائی، عالمی برادری نے یہ کیا ہے" ۔ امریکی صدر کا اشارہ ان بین الاقوامی قوانین کی طرف تھا جن کے تحت کیمیاوی ہتھیاروں کے استعمال پر پابندی ہے حتٰی کہ جنگ میں بھی۔

پوٹن اس بات کی پوری کوشش کریں گے کہ شام کا تنازعہ اجلاس کا مرکزی موضوع نہ بنے کیونکہ جی ٹونٹی میں شامل ممالک کا شام کے مسئلے کے حل پر متفق ہونا تقریباً ناممکن ہے۔