جینیاتی ترمیم شدہ بچوں کی پیدائش، سائنسدان کو جیل کی سزا

گزشتہ برس نومبر میں چین کے بائیو فزکس کے محقق ہیجیان کوئی نے دنیا میں پہلے جینیاتی سطح پر ترمیم شدہ بچوں کی پیدائش کا دعویٰ کیا تھا۔ آج پیر 30 دسمبر کو چین کی ایک عدالت نے انہیں تین برس قید کی سزا سنا دی ہے۔ اس پورے تحقیقی عمل میں ہیجیان کوئی کا ساتھ دینے والے دیگر دو سائنسدانوں کو بھی سزائیں سنائی گئی ہیں تاہم ان کی قید کا عرصہ کم رکھا گیا ہے۔

عدالت کا اس حوالے سے فیصلہ سناتے ہوئے کہنا تھا، ''تینوں سائنسدانوں کے پاس ایسا کرنے کے لیے کوئی مناسب اجازت نامہ موجود نہیں تھا اور انہوں نے ایسا دولت اور شہرت کے لیے کیا۔ انہوں نے سائنسی تحقیق اور طبی علاج میں جان بوجھ کر قومی ضابطوں کی خلاف ورزی کی۔‘‘ اس حوالے سے مزید کہا گیا ہے، ''انہوں نے سائنسی تحقیقی اور طبی اخلاقیات میں سب سے نیچے والی لائن کو عبور کیا ہے۔‘‘

گزشتہ برس اس چینی سائنسدان نے یوٹیوب پر ایک ویڈیو جاری کرتے ہوئے دعویٰ کیا تھا کہ دنیا میں پہلی مرتبہ جینیاتی طور پر ترمیم شدہ جڑواں بہنوں کی پیدائش میں کامیابی حاصل کر لی گئی ہے۔ یاد رہے کہ جینیاتی ایڈیٹنگ کے طاقتور ہتھیار سے زندگی کا 'بلیو پرنٹ‘ دوبارہ لکھا جا سکتا ہے۔ اس طرح کی جین ایڈیٹنگ پر امریکا میں پابندی ہے کیوں کہ ڈی این اے میں کی جانے والی تبدیلیاں اگلی نسل تک منتقل ہو سکتی ہیں اور  ان تبدیلیوں سے دیگر جینز کو بھی نقصان پہنچنے کا خطرہ ہے۔

پہلے جینیاتی تبدیلیاں اور پھر کلوننگ، انتہا کیا ہو گی؟

بہت سے سائنسدانوں کے خیال میں یہ ٹیکنالوجی ابھی ابتدائی مراحل میں ہے اور اسے انسانوں پر آزمانا انتہائی غیر محفوظ ہے جبکہ کچھ سائنسدانوں نے اس عمل کی مذمت کرتے ہوئے اسے انسانوں پر تجربات قرار دیا تھا۔ اُس وقت چین کے جنوبی شہر شینزن کے محقق ہیجیان کوئی کا نیوز ایجنسی اے پی سے گفتگو کرتے ہوئے کہنا تھا کہ انہوں نے سات جوڑوں کے ایمبریوز میں تبدیلیاں کی تھیں لیکن ان میں سے صرف ایک کوشش ہی کارگر ثابت ہوئی۔

ان کا کہنا تھا کہ اس کا مقصد کسی وراثتی بیماری کو ٹھیک کرنا یا روکنا نہیں تھا بلکہ اس طرح ان بچوں میں ایک ایسی خاصیت پیدا کی گئی ہے، جو عمومی طور پر بہت ہی کم لوگوں میں پائی جاتی ہے۔ ان دو بچیوں میں ایچ آئی وی وائرس اور ایڈز کے خلاف مزاحمت پیدا کی گئی ہے۔

تاہم اس تجربے کے بعد ایک نئی تحقیق سامنے آئی تھی، جس میں کہا گیا تھا کہ جن انسانوں میں جینیاتی تبدیلیاں کی جاتی ہیں، ان میں وقت سے پہلے موت کا خطرہ بڑھ جاتا ہے۔

ا ا ا / ب ا (روئٹرز، اے پی، اے ایف پی)