خاشقجی کی ہلاکت پر سعودی وضاحت ناکافی ہے، میرکل

خبر رساں ادارے روئٹرز کے مطابق جرمن چانسلر انگیلا میرکل اور جرمن وزیر خارجہ ہائیکو ماس کی طرف سے آج ہفتہ 20 اکتوبر کو جاری ہونے والے ایک مشترکہ بیان میں کہا گیا، ’’ہم سخت ترین الفاظ میں اس عمل کی مذمت کرتے ہیں۔‘‘ اس بیان میں مزید کہا گیا، ’’اس ہلاکت کی وجوہات کے بارے میں ہم سعودی عرب سے شفافیت کی توقع کرتے ہیں۔۔۔ استنبول میں پیش آنے والے واقعات کے بارے میں دستیاب معلومات نا کافی ہے۔‘‘

جرمن چانسلر انگیلا میرکل اور جرمن وفاقی وزیر خارجہ ہائیکو ماس کی طرف سے جاری ہونے والے مشترکہ بیان میں سعودی صحافی جمال خاشقجی کے دوستوں اور اہل خانہ سے ہمدردی کا اظہار کرتے ہوئے کہا گیا ہے کہ خاشقجی کے قتل کے ذمہ دار افراد کو لازمی طور پر انصاف کے کٹہرے میں لایا جانا چاہیے۔

خیال رہے کہ سعودی حکومت کے ناقد سعودی صحافی جمال خاشقجی دو اکتوبر کو استنبول میں واقع سعودی قونصل خانے جانے کے بعد سے لاپتہ تھے۔ ترک حکام کا دعویٰ تھا کہ خاشقجی کو سعودی قونصل خانے میں ہی قتل کر کے ان کی لاش ٹھکانے لگا دی گئی تھی۔

عالمی برادری کی طرف سے شدید دباؤ کے بعد ترک اور سعودی مشترکہ تحقیقات کے بعد سعودی عرب نے تسلیم کر لیا کہ صحافی جمال خاشقجی استنبول میں سعودی قونصل خانے میں ہی مارے گئے تھے۔

سعودی میڈیا نے ابتدائی چھان بین کے نتائج کے بعد تصدیق کی کہ خاشقجی دراصل قونصل خانے میں ہونے والی ایک ہاتھا پائی میں ہلاک ہوئے۔ بتایا گیا ہے کہ اس واقعے کے بعد سعودی حکومت نے اٹھارہ مشتبہ افراد کو گرفتار کیا اور دو اہم اہلکاروں کو برطرف بھی کر دیا۔

ا ب ا / ع آ (روئٹرز)