روسی سیاست میں ڈرامائی تبدیلی: ’شام میں الیکشن چاہتے ہیں‘

ماسکو سے ہفتہ چوبیس اکتوبر کے روز ملنے والی نیوز ایجنسی روئٹرز کی رپورٹوں کے مطابق روسی وزیر خارجہ سیرگئی لاوروف نے آج کہا کہ کریملن کی خواہش ہے کہ شام میں پارلیمانی اور صدارتی الیکشن کی تیاریاں شروع کی جائیں۔ لاوروف نے یہ بھی کہا کہ شامی تنازعے کے حل کے لیے ماسکو اسد حکومت کے مخالف باغیوں کی فری سیریئن آرمی کو فضائی مدد فراہم کرنے پر بھی تیار ہے۔

روئٹرز نے لکھا ہے کہ روسی وزیر خارجہ کے یہ بیانات شام سے متعلق روسی پوزیشن میں ایک ڈرامائی تبدیلی کا پتہ دیتے ہیں، خاص کر ویانا میں ابھی کل جمعہ تئیس اکتوبر کے روز ہونے والے اس اجلاس کے بعد جس میں روس، امریکا اور دیگر ملکوں کے وزراء نے شامی تنازعے کے سیاسی حل کے بارے میں بحث کی تھی۔

سیرگئی لاوروف نے روس کے سرکاری ٹیلی وژن کے ساتھ ایک انٹرویو میں کہا، ’’بیرونی کھلاڑی شامیوں کے لیے کسی بھی بات کا فیصلہ نہیں کر سکتے۔ ہمیں شامی عوام کو مجبور کرنا پڑے گا کہ وہ اپنے ملک کے لیے خود ایک منصوبہ تیار کریں، ایک ایسا پلان جس میں تمام مذہبی، نسلی اور سیاسی گروپوں کے مفادات کے تحفظ کو یقینی بنایا گیا ہو۔‘‘

لاوروف کے اس بیان کا ایک اہم پہلو یہ بھی تھا کہ انہوں نے زور دے کر کہا کہ انہیں محسوس ہوتا ہے کہ دوسرے ملکوں نے، شامی صدر بشار الاسد کے خلاف اپنی مسلسل بیان بازی کے باوجود، بالآخر شام کی صورت حال کو بہتر طور پر سمجھنا شروع کر دیا ہے۔ روئٹرز کے مطابق لاوروف نے کہا کہ یہی وہ تبدیلی ہے جو ماسکو کو یہ امید دلاتی ہے کہ مستقبل قریب میں شام میں سیاسی عمل کو آگے بڑھایا جا سکے گا۔

سیرگئی لاوروف کے انہی بیانات میں سے ایک اہم بیان یہ بھی ہے کہ روس شام میں اسد مخالف باغیوں کی فری سیریئن آرمی کو مکمل فضائی حمایت بھی مہیا کر سکتا ہے لیکن اس کے لیے لاوروف نے شرط یہ رکھی کہ پہلے امریکا کو اس امر کے تعین میں مدد دینا ہو گی کہ وہ شام میں ’محب وطن اپوزیشن‘ کا نام کن طاقتوں کو دیتا ہے۔

شام میں دہشت گرد تنظیم دولت اسلامیہ یا داعش کے ٹھکانوں پر امریکی قیادت میں کیے جانے والے فضائی حملوں اور پھر کئی ہفتے قبل روس کی طرف سے بھی اسلامک اسٹیٹ کے خلاف فضائی کارروائیاں شروع کیے جانے کے پس منظر میں لاوروف نے کہا کہ امریکا ابھی تک شام میں اپنی عسکری کارروائیوں کو روس فضائی کارروائیوں کے ساتھ مربوط کرنے سے جو انکار کر رہا ہے، وہ ’ایک بڑی غلطی‘ ہے۔