سربیا میں مہاجرین کے کیمپ، فوج تعینات کر دی گئی

بلقان کی ریاست سربیا کی وزارت دفاع کے ایک اعلامیے میں بتایا گیا ہے کہ ہمسایہ ملک کروشیا کے ساتھ سرحد پر واقع اس سرب قصبے کی جانب فوج دستے روانہ کرنے کا حکم ملکی صدر الیکسانڈر وُوچِچ نے دیا۔ سربیا کے صدر نے فوج کو ہدایت کی ہے کہ وہ سرحدی قصبے سِڈ (Sid) پہنچ کر وہاں امن و امان کی مخدوش صورت حال کو کنٹرول کرے۔

سِڈ میں واقع تین مہاجر کیمپوں میں پناہ کے متلاشی تقریباﹰ پندرہ سو ایسے تارکین وطن مقیم ہیں، جو یورپی یونین میں داخلے کے خواہش مند ہیں۔ وہ گزشتہ کئی ماہ سے ان کیمپوں میں انتہائی پریشان کن حالات کا سامنا کرتے ہوئے رہائش پذیر ہیں۔

زیادہ تر مہاجرین کا تعلق پاکستان، افغانستان اور شام سے

سِڈ کے ان تین مہاجر کیمپوں میں مقیم تارکین وطن کا تعلق پاکستان، افغانستان اور شام سے بتایا گیا ہے۔

صدر وُوچِچ نے ملکی فوج کو ہدایت کی ہے کہ وہ مقامی آبادی کو مہاجرین کی جانب سے مبینہ طور پر ڈرائے دھمکائے جانے اور ہراساں کیے جانے کے خلاف تحفظ فراہم کریں۔

فوج کو یہ بھی کہا گیا ہے کہ وہ اس قصبے میں ہونے والی چوری چکاری کی وارداتوں پر بھی قابو پائے۔ ایسی کئی وارداتوں کا الزام ان مہاجرین پر ہی لگایا جاتا ہے۔

سربیا کے صدر نے ایک مقامی ٹیلی وژن چینل سے گفتگو کرتے ہوئے بتایا کہ کورونا وائرس کی وبا کو کنٹرول کرنے کے لیے لگائی جانے والی ایمرجنسی رواں ماہ کے اوائل میں اٹھا لیے جانے کے بعد سے سِڈ میں واقع مہاجرین نے مقامی کیمپوں سے نکل کر چھوٹی موٹی مجرمانہ وارداتوں کا سلسلہ شروع کر رکھا ہے۔ اس کے علاوہ یہ غیر ملکی لوگوں کے گھروں میں غیر قانونی طور پر داخل ہونے سے بھی گریز نہیں کرتے۔

'سرحدی قصبہ محفوظ نہیں رہا‘

صدر وُوچِچ نے واضح طور پر کہا کہ اب یہ سرب سرحدی قصبہ محفوظ نہیں رہا اور اس صورت حال میں بہتری کے لیے وہاں فوجی دستے بھیجنے کا فیصلہ کیا گیا ہے۔

دوسری جانب یہ بھی کہا جاتا ہے کہ سِڈ میں ان مہاجرین کے خلاف عدم برداشت کی کیفیت میں بھی شدت آ چکی ہے۔ اس قصبے اور اس کے نواحی علاقوں سے سربیا کے مقامی مہاجرین مخالف انتہا پسند ان کیمپوں کے سامنے اپنے احتجاج کا سلسلہ بھی جاری رکھے ہوئے ہیں۔

سربیا میں مجموعی طور پر یورپی یونین پہنچنے کے خواہاں تقریباً چار ہزار تارکین وطن پھنسے ہوئے ہیں۔

جنگ زدہ علاقوں اور دیگر ممالک سے اپنی مفلوک الحالی سے تنگ یہ مہاجرین بلقان کے خطے کا مشکل راستہ اپناتے ہوئے یورپ پہنچنے کی کوشش میں ہیں لیکن انہیں آگے بڑھنے میں سخت رکاوٹوں کا سامنا ہے۔

ع ح، م م (اے پی)